Anglıanyń Slıford qalasynyń turǵyny, 2020 jyly qyrkúıekte COVID-19-ben aýyrǵan qyz on aıdan beri aýrýdyń zardabyn tartyp kele jatqanyn aıtty.
Lılıana Djekson aýyrǵanǵa deıin salaýatty ómir saltyn ustanǵan, júzýmen aınalysqan. 2020 jyldyń qyrkúıeginde qyz ózin nashar sezinip, jańa koronavırýstyq ınfeksıaǵa test tapsyryp, nátıjesi oń bolǵan, dep habarlaıdy Almaty-akshamy.kz Lenta.ru saıtyna silteme jasap.
«Men qoryqqan joqpyn, bir-eki apta ǵana aýyratyn shyǵarmyn dep oıladym. Munyń sonsha ýaqytqa sozylatynyn kim bilgen», - dep eske alady Djekson.
Alaıda, bir aptadan keıin Lılıananyń qyzýy kóterilip, búkil denesinde bórtpe paıda bolýyna baılanysty aýrýhanaǵa túsedi. Dárigerler oǵan saýyǵyp kete salysymen bári joıylatynyn aıtyp, kóp uzamaı aýrýhanadan shyǵarǵan. Biraq olardyń boljamdary durys bolmaı, qyzdyń únemi keýde tusy aýyryp, entigip, álsizdik sezinetin. Jan tózgisiz nevralgıalyq aýrýyna baılanysty ol qysqy demalysta qaıtadan aýrýhanaǵa túsedi.
Qazirgi kezde Lılıana on aıdan beri aýrýdyń azabyn tartyp júr jáne dárigerler onyń shaǵymdaryn durys qabyldamaıdy dep qatty ýaıymdaıdy.
Dárigerler oǵan jáne onyń anasyna jasóspirimderde «uzaq KOVID» bolmaıtynyn birneshe ret aıtqan. «Bul jaǵdaıdaǵy eń jaman nárse osy shyǵar, óıtkeni bizge eshkim bizdi tyńdamaıtyn sıaqty kórinedi», - dep shaǵymdandy Lılıananyń anasy.
Saıyp kelgende, Djekson áleýmettik jelide qoldaýshylar taýyp, «uzaq merzimdi COVID»-ten emdelýge klınıkaǵa jatady. Alaıda sımptomdary áli de tolyq joıylmaǵan, bul onyń emtıhandarǵa daıyndalýyn qıyndatyp otyr.
«Aýrýdyń kesirinen oıymdy durys tujyrymdaý jáne saýatty jazyp jetkizý úshin kóp kúsh jumsaýym kerek», - deıdi brıtandyq qyz. Ol ózi sıaqty jaǵdaıǵa tap bolmas úshin qurbylaryn pandemıa kezinde densaýlyqqa jaýapkershilikpen qaraýǵa shaqyrdy.
«Uzaq COVID» - bul uzaq jáne aýyr ótetin koronavırýstyq jańa ınfeksıanyń túri. Bul termındi Ulybrıtanıanyń Ulttyq densaýlyq saqtaý qyzmeti (NHS) resmı túrde moıyndady.