Tas kómir óndirisi bir jylda 2 paıyzǵa artqan.
Kómirdiń baǵasy bir jylda 5 paıyzǵa qymbattady, dep habarlaıdy Almaty-akshamy.kz Energyprom.kz saıtyna silteme jasap.
Bıylǵy qańtar-qyrkúıek aılarynda qońyr kómir men kómir konsentratyn qosqanda óndirilgen kómir kólemi 82,1 mln tonnany qurady, bul 2020 jyldyń osy kezeńimen salystyrǵanda 1,5%-ǵa artyq. Kómirdiń jartysynan astamy ádettegideı Pavlodar oblysyna (47,9 mln. tonna), taǵy úshten bir bóligi – Qaraǵandy oblysyna (27,7 mln. tonna) tıesili. Shyǵys Qazaqstan oblysynda da aıtarlyqtaı kólemde kómir (6 mln. tonna) óndirildi.
Óndirilgen kómirdiń jalpy kóleminiń 76,1 mln tonnasy tikeleı tas kómir, bul ótken jyldyń qańtar-qyrkúıek aılarymen salystyrǵanda 2%-ǵa artyq.
Jalpy, 2020 jyly qońyr kómir men kómir konsentratyn qosqanda tas kómir óndirý kólemi 113,4 mln tonnany qurady, bul 2019 jylmen salystyrǵanda 1,4%-ǵa az. Onyń 104,1 mln tonnasy tas kómir, bul 2019 jylmen salystyrǵanda 0,7%-ǵa az.
Qazaqstanda 2021 jyldyń qyrkúıek aıynyń sońyndaǵy málimeti boıynsha, kómir baǵasy jyldyq ortasha eseppen 5,1%-ǵa ósken. Osy saladaǵy baǵanyń qymbattaýy ekinshi jyl qatarynan baıqalýda.
Qazaqstan Respýblıkasynyń 17 óńiriniń 14-inde kómir baǵasy qymbattap ketken, qymbatshylyq qatty baıqalǵan aımaq – Shyǵys Qazaqstan oblysy (jyldyq kórsetkish 10,8%), odan keıin Jambyl jáne Túrkistan oblystary (8,6%). Kómir baǵasy arzandaǵan jalǵyz aımaq – Batys Qazaqstan oblysy (1%).
Qazaqstan Respýblıkasynyń iri qalalary men megapolısteriniń arasynda aǵymdaǵy jyldyń qyrkúıek aıynda eń qymbat kómir Oralda boldy: tonnasy 19,3 myń teńge. Taraz (15,6 myń teńge) ben Túrkistan (tonnasy 15,3 myń teńge) qalalarynyń turǵyndary da qymbat otyndy satyp alýǵa májbúr boldy.
Eń arzan kómirdi Semeı (9,8 myń teńge), Qaraǵandy (10,8 myń teńge) jáne Óskemen qalalarynan (tonnasyna 10,9 myń teńge) satyp alýǵa bolady.