Osy aptada koronavırýsqa qarsy 5 pen 11 jas aralyǵyndaǵy balalardy egý sharasy bastalady, dep habarlaıdy almaty-akshamy.kz «Habar 24» silteme jasap.
Ol úshin Pfizer BioNTech kompanıasynyń ekpesi tańdaldy. Preparatty ótken juma kúni eldiń Azyq-túlik jáne dári-dármekti sanıtarlyq qadaǵalaý basqarmasy qoldanýǵa ruqsat berdi. Aq úıdiń málimdeýinshe, jýyq arada ekpe ortalyqtaryna mıllıondaǵan doza jetkiziledi.
Úkimet osy jastaǵy 28 mıllıon balaǵa jetkilikti dárejede doza satyp alǵan. Mamandardyń aıtýynsha, ekpeniń kovıdke qarsy qorǵanyshy - 90 paıyz.
AQSH-ta osy ýaqytqa deıin 18 jasqa deıingi 6 mıllıon baladan koronavırýs anyqtalǵanyn bilemiz. Olardyń 2 mıllıony 5 pen 11 jas aralyǵyndaǵy búldirshinder. Bul balalardy jedel vaksınalaý qajet ekenin kórsetip otyr. Men ózim eki balanyń ákesimin. Bul – ata-analar úshin qıyn tańdaý. Biraq balalarymyzdy juqpaly dertten qorǵaýdyń eń tıimdi joly osy, - dedi dáriger Metú Harrıs.
Aıta keteıik, buǵan deıin «Moderna» kompanıasy da koronavırýsqa qarsy 6 men 11 jas aralyǵyndaǵy balalarǵa arnalǵan ekpe jasap shyǵarǵanyn málimdegen edi. Biraq birlestik ótken jeksenbi kúni AQSH-tyń retteýshi organyna ony qoldanýǵa ótinish berýdi keıinge qaldyratynyn málimdedi.