2021 jylǵy 1 qarashada QR premer-mınıstri Asqar Mamın Shotlandıanyń Glazgo qalasynda klımattyń ózgerýi jónindegi BUU Negizdemelik konvensıasynyń Álem kóshbasshylary samıtine (SOR26) qatysty dep habarlaıdy almaty-akshamy.kz
Úkimet basshysy óz sózinde Qazaqstan álemde alǵashqylardyń biri bolyp Parıj kelisimin ratıfıkasıalaǵanyn atap ótti (2016 jylǵy 6 jeltoqsanda). Atalǵan qujatty júzege asyrý úshin QR 2030 jylǵa qaraı parnıktik gaz shyǵaryndylaryn 15%-ke qysqartýǵa nıetti. Qoıylǵan maqsatqa qol jetkizý úshin Qazaqstan ulttyq deńgeıde aıqyndalǵan úlesin (UDAÚ) jańartty, sondaı-aq jańa Ekologıalyq kodeksti qabyldady.
«Qazaqstan jańartylatyn energıa kózderinen alynatyn energıa kólemin 3%-ten 15%-ke deıin 5 ese, ekologıalyq taza kózderden óndiriletin energıa óndirisin 20%-ten 38%-ke deıin 2 ese arttyrady. 2025 jylǵa qaraı 2 mlrd-tan astam aǵash otyrǵyzý esebinen kómirtekti sińirý áleýeti artady. Kómirden óndiriletin energıa úlesi 70%-ten 40%-ke deıin tómendeıdi dep josparlanýda», – dedi A.Mamın.
Premer-mınıstr 2020 jylǵy jeltoqsandaǵy Klımattyq ambısıalar jónindegi samıtte QR Prezıdenti Qasym-Jomart Toqaev Qazaqstannyń 2060 jylǵa qaraı kómirtekti beıtaraptyqqa qol jetkizý maqsatyn jarıalaǵanyn atap ótti.
QR Úkimeti ony iske asyrý úshin energetıka, óńdeý ónerkásibi, aýyl jáne orman sharýashylyǵy, kólik, TKSH jáne qaldyqtardy kádege jaratýǵa basa nazar aýdara otyryp, ekonomıkanyń barlyq sektorlarynda eleýli reformalardy kózdeıtin strategıalyq qujatty ázirleýdi aıaqtaýda, dep habarlaıdy premer-mınıstrdiń baspasóz qyzmeti.
Qazaqstannyń kómirtegi beıtaraptyǵyna jer men sýdy paıdalanýdyń ornyqtylyǵyn, ekonomıkanyń energetıkalyq tıimdiligin arttyrý, elektrlendirý jáne ekologıalyq taza, onyń ishinde jańartylatyn energıa kózderin keń aýqymdy paıdalaný arqyly qol jetkiziletin bolady.
Parnıktik gaz shyǵaryndylaryn azaıtý josparlaryn iske asyrý kezinde naryq tetikteri men jeke ınvestısıalardyń áleýeti barynsha paıdalanylady. Úkimet basshysy Qazaqstannyń ornyqty damý boıynsha Ortalyq Azıanyń Aımaqtyq klımattyq haby bolýǵa beıildiligin rastady.
Bul aımaq elderiniń kúsh-jigerin AHQO Jasyl qarjy ortalyǵynyń jáne klımattyq kún tártibimen aınalysatyn basqa da aımaqtyq uıymdardyń alańynda tehnologıalar transferti, jasyl qarjylandyrýdy tartý, bilim men ınovasıalar almasý arqyly «jasyl» ekonomıkalyq ósýdi qamtamasyz etýde biriktirýge múmkindik beredi. SOR26 sheńberinde Qazaqstan Ormandar jáne jerdi paıdalaný deklarasıasyna, sondaı-aq Jastarǵa bilim berý jáne olardy tartý mindettemesine qosyldy.
Álem kóshbasshylary samıti kezinde Qazaqstan Úkimetiniń basshysy Fınlándıa Prezıdenti Saýlı Nıınestemen, Mońǵolıa Prezıdenti Ýhnaagıın Hýrelsýhpen, Qyrǵyzstan Prezıdenti Sadyr Japarovpen, Latvıa Prezıdenti Egıls Levıtspen, Nıderlandy premer-mınıstri Mark Rúttemen, Úndistan Premer-Mınıstri Narendra Modımen jáne AQSH Prezıdentiniń klımat máseleleri jónindegi Arnaıy ýákili Djon Kerrımen kezdesý ótkizdi.
Qazaqstannyń Dúnıejúzilik saýda uıymynyń 12-shi mınıstrlik konferensıasyna (Jeneva qalasy, 2021 j. 30 qarasha-3 jeltoqsan) tóraǵalyq etýge daıyndyǵy aıasynda QR premer-mınıstri A.Mamın DSU Bas dırektory Ngozı Okondjo-Ivealamen jáne Ulybrıtanıanyń Memlekettik syrtqy saýda mınıstri Enn-Marı Trevelánmen kezdesti.
Sapar jáne ekijaqty kezdesýler qorytyndysy boıynsha Qazaqstan Respýblıkasy men Ulybrıtanıa jáne Soltústik Irlandıa Qurama Koróldigi úkimetteriniń klımattyń ózgerýine ún qatý jónindegi strategıalyq seriktestik jáne birlesken kúsh-jiger týraly birlesken málimdemesi qabyldandy. Qujat qorshaǵan ortany qorǵaý, ekonomıkany dekarbonızasıalaý salasyndaǵy yntymaqtastyqty nyǵaıtýdy, jańartylatyn energıa kózderin damytý, «jasyl» qarjylandyrý, ormandardy saqtaý, jerdi paıdalanýdyń tıimdiligin arttyrý jáne t.b. salalardaǵy Qazaqstannyń áleýetin iske asyrýdy kózdeıdi.
«Qazaqstan táýelsizdik alǵan jáne dıplomatıalyq qatynastar ornatylǵan sátten bastap 30 jyl ishinde Qazaqstan men Ulybrıtanıa óz baılanystaryn ózara senimge, ortaq qundylyqtar men tıimdi yntymaqtastyqqa negizdelgen berik seriktestikke aınaldyrdy», – dep atap ótilgen birlesken málimdemede.