Qazaqstan Respýblıkasynyń otyn-energetıkalyq keshenin damytýdyń 2023-2029 jyldarǵa arnalǵan tujyrymdamasynda kómir óndirýdi jyl saıyn ulǵaıtý kózdelgen.
Atalmysh tujyrymdama Qazaqstan Respýblıkasy Úkimetiniń 2014 jylǵy 28 maýsymdaǵy № 724 qaýlysymen bekitilgen. QR Ónerkásip jáne qurylys mınıstrligi kómir ónerkásibi salasyna basshylyq ete otyryp memlekettik saıasatty iske asyrady, dep habarlaıdy almaty-akshamy.kz.
Energıa óndirýshi jáne ónerkásip kásiporyndarynyń, búdjettik uıymdardyń jáne halyqtyń kómir ónimine qajettiligin qamtamasyz etý maqsatynda kómir hımıasyna kezeń-kezeńimen kóshýmen kómir óndirýdi ulǵaıtýǵa, sondaı-aq eldiń eksporttyq áleýetin arttyrýǵa jumys jasalýda.
Jaqyn ýaqytta Bogatyr kómir kenishinde sıkldik-aǵyndyq tehnologıanyń iske qosylýy kútilýde. Bul 42 mln tonnadan 50 mln tonnaǵa deıin kómir óndirýdi ulǵaıtýǵa múmkindik beredi.
Óndirilgen kómirdiń jalpy kólemindegi kómir eksportynyń úlesi 26-28% quraıdy. Sońǵy bes jyldaǵy kómir eksportyn taldaý eksporttyq áleýettiń progresıvti sıpatqa ıe ekendigin kórsetedi.
QR Ulttyq statısıka búrosynyń derekteri boıynsha alys shet elderge tas kómir men lıgnıt eksporty 6,5 esege (1,3 mln.tonnadan 8,5 mln. tonnaǵa deıin) ulǵaıdy.
Bul, eń aldymen, Eýropalyq Odaqtyń qazaqstandyq kómirge degen suranysynyń artýyna baılanysty. Osylaısha, otandyq jer qoınaýyn paıdalanýshylardyń eksporttyq áleýeti suranysqa saı arta túsetin bolady.