Almaty-akshamy.kz saıtynda búgin jaryq kórgen jańalyqtarǵa sholý – kún kerýeni
«Terenkýrda» tegin syrǵanaıtyn kim?
«Terenkýr» demalys aımaǵynyń toǵanynda qysqy túbıńterge arnalǵan 50 metrlik syrǵanaq salyndy. «Snejnaıa gorka» áleýmettik jobasy jeke qarjy esebinen ornatyldy. Syrǵanaqtyń basty ereksheligi, onyń toǵanǵa ornalasýy jáne syrǵanaq tebýge qaýipsiz. 20 gradýs buryshtyq qurylym 5 bólikke bólingen, árqaısysy arnaıy tormen qorshalǵan. Al márede tejegish tor jáne arnaıy jumsaq qaptar bar. Balondy bir saǵatqa jalǵa alý quny 3 myń teńge. Bir rettik syrǵanaý - 500 teńge. Tıisti qujatyn kórsetken áleýmettik osal sanattaǵy turǵyndarǵa qyzmet tegin.
Qytaıda Qazaqstan týrızmi jyly ótedi
Qytaı týrıseri byltyr Qazaqstanǵa eń kóp kelgen TOP-5 eldiń qataryna endi. Statısıka derekteri boıynsha, byltyrǵy jyldyń 9 aıynda Qazaqstanda 75 myńnan astam qytaılyq týrıske qyzmet kórsetilgen. Al Qytaıdan Qazaqstanǵa kelýshilerdiń jalpy sany 200 myń adamnan asty. Vedomstvo basshysy byltyr eki el arasynda vızasyz rejım engizilgenin jáne bıyl tikeleı reıster sanyn aptasyna 30-ǵa deıin ulǵaıtý josparyn eskere otyryp, týrısik aǵynnyń odan ári artýy múmkin ekenin atap ótti.
Sot oryndaýshynyń jumysyn robot atqarady
Osyǵan deıin azamattar salynǵan aıyppuldy ýaqytynda óteı almaǵan jaǵdaıda, aıyppuldyń 25%-ǵa deıingi somasyn jeke sot oryndaýshyǵa tóleýge mindetti bolatyn. Endi bul qyzmetti robot tegin atqarady. Jańa jobanyń arqasynda el azamattary 2 mlrd teńgege deıin únemdeı alady. Joba sátti júzege asatyn bolsa, ony búkil Qazaqstan aýmaǵyna engizý josparlanyp otyr.
Kúrish nege qymbat?
Sýdyń jetispeýshiligine jáne shyǵyndardyń ósýine baılanysty egis alqaptarynyń ádeıi tómendeýi baıqalady.
Monopolıaǵa qarsy den qoıý sharalary kúntizbelik jyl ishinde baǵa ósý dınamıkasynyń tómendeýin qamtamasyz etti. Baǵa boıynsha sóz baılasý negizinde 6 kúrish óndirýshi 68,7 mln teńge aıyppul túrindegi ákimshilik jaýapkershilikke tartyldy.
Kandelakıdi kirgizbeımiz!
QR SİM resmı ókili Aıbek Smadıarovtyń aıtýynsha, eger reseılik telejúrgizýshi elimizge kelýdi josparlasa, oǵan kirýge ruqsat berilmeıdi
"El muny eshqashan keshirmeıdi, ol kelmeıtin shyǵar, biraq ol kelgisi kelse, ony kirgizbeıdi", dedi Aıbek Smadıarov.
Tına Kandelakıdiń málimdemesine "Ýralsk" vokzalynyń ataýyn "Oral" jáne "Ýzen" stansasynyń "Jańaózen" dep ózgertilýi sebep bolǵan.
Iordanıanyń ánderine «jıendik» jasaımyz
Búginde estrada ókilderi ózge eldiń ánin qazaqsha oryndaýdy jolǵa qoıyp alǵan. Ortalyq Azıa elderi, onyń ishinde Ózbekstan men Qyrǵyzstan sazgerleriniń týyndysyn qazaqsha saıratý sánge aınalǵan.
Qazaqstannyń eńbek sińirgen qaıratkeri, óner zertteýshisi, sazger Janǵalı Júzbaev óz qundylyǵymyzdy dáripteý mindet ekenin aıtty.
«Shetelden keletin qonaqtardyń aldynda ótkizetin konserttik sharany da ulttyq qundylyqqa qaraı ıkemdegen abzal. Ony aıtqanym, bizde keıde bir keleńsizdik oryn alady. Aýqymy keń konserttik is-shara ótkizip, alys-jaqyn shetelden de ónerpazdar qatysqan dýmanda ánshilerimiz shyrqaǵan týyndysyn tyńdaǵanda uıalyp ta qalamyz. Óıtkeni búgingi estrada sahnasynda án shyrqap júrgen ánshilerdiń kópshiligi qyrǵyz, ózbek, qaraqalpaq, armán halqynyń ánderin alady da, qazaqshalap oryndaıdy. Parsy mádenıetine de qol saldyq, tipti, Iordanıadan da án aldyq. Ári osyndaı kirme týyndylardyń nasıhaty surapyl: telearnadan da kórsetip, radıodan da taratady», - dedi ol.
Fransıalyq dzúdoshy Almatyda jattyǵý jasap júr
Onyń úlken jarys aldynda nelikten Qazaqstandy tańdaǵany belgisiz, óziniń aıtýynsha, sportshy mańyzdy jarys aldyndaǵy daıyndyǵyn Almatyda pysyqtaýdy jón kórgen. 35 jastaǵy Rıner Almatyǵa 18 qańtar kúni kelip, jospar boıynsha 30-na deıin jattyǵý jumystaryn jalǵastyrady.
Aıta keteıik, fransýz sportshysy 2023 jyldyń basynda Almatyda oqý-jattyǵý jıyndaryna qatysqan bolatyn. Sol joly ol asa aýyr salmaqtaǵy jıyrmaǵa tarta Qazaqstan dzúdoshysymen sparrıng jattyǵýlar ótkizgen.
Byltyr Aralǵa 2 mlrd tekshe metrden astam sý jibergen
«Aldaǵy úsh jyldy biz tıimdi ári utymdy paıdalanýymyz kerek. Birinshiden, árıne, ózimizdiń ulttyq múddemizdi qorǵaý jáne Orta Azıadaǵy kórshiles memlekettermen qarym-qatynasty damytý máselesi. Sondyqtan bul jumys kúndelikti baqylaýda bolýy kerek. Ózderińizge júktelgen mindetterdi jaýapkershilikpen atqaryńyzdar», – dedi QR Sý resýrstary jáne ırrıgasıa mınıstri Nurjan Nurjigitov.
2024 jyldyń 1 qańtarynda Halyqaralyq Araldy qutqarý qoryna tóraǵalyq etý kezegi Qazaqstan Respýblıkasyna ótti. Bizdiń elimiz aldaǵy úsh jylda atalǵan uıymdy basqaratyn bolady.