Qazaqstanda túngi kóńil kóterý oryndarynda spırttik ishimdikterdi satý ýaqytyn shekteý jáne olardyń saýdasyna qosymsha baqylaý sharalaryn engizý usynyldy, dep habarlaıdy Aqshamnews.kz tilshisi İİM basshysy Erjan Sádenovtiń bastamasyna silteme jasap.
Mınıstrdiń aıtýynsha, jyl saıyn mas kúıdegi adamdardyń qatysýymen 10 myńǵa jýyq qylmys jasalady.
"Biz profılaktıkalyq sharalar qabyldap júrmiz: mas kúıinde ishimdik ishý faktileriniń jolyn kesemiz, qoǵamdyq oryndardan mas adamdardy oqshaýlaımyz, eseptegi azamattarǵa alkogól tutynýǵa tyıym salamyz. Alaıda bul saldarmen kúres qana", - dedi Sádenov dúısenbi kúni İİM-de ótken Májilistiń kóshpeli úkimettik saǵatynda.
Ol polıseılardyń ókilettigi kóbine májbúrleý sharalarymen shekteletinin atap ótti.
"Paıda úshin keı kásipkerler spırttik ishimdikterdi satý boıynsha jas shekteýlerin jáne ýaqyt rejımin buzady, kafe-bar búrkenshigimen táýlik boıy saýdalaıdy, onlaın jetkizýdi belsendi qoldanady. Bul rette lısenzıadan aıyrý sharasy tıimsiz: kelesi kúni basqa tulǵalarǵa rásimdep alady", - dep túsindirdi mınıstr.
İİM ázirlegen usynystar vedomstvoaralyq komısıa otyrysynda qaralǵan. Atap aıtqanda, mynadaı sharalar usynylady:
- Alkogóldi bólshek saýdany tek mamandandyrylǵan dúkenderde alkomarketterde ǵana ruqsat etý;
- Lısenzıa berý talaptaryn qatańdatý, sonyń ishinde olardy lımıtteý;
- Alkogóldiń onlaın-saýdasyna tolyqtaı tyıym salý.
Buǵan qosa, vedomstvo oıyn-saýyq oryndarynda spırttik ishimdikterdi satý ýaqytyn shekteýdi qajet dep sanaıdy.
"Mundaı oryndarda mas kúıinde 1 400-den astam qylmys jasaldy, onyń ishinde úsh kisi ólimi bar. Degenmen, búgin keı memlekettik organdar bul tásilderdi qoldamaıdy. Menińshe, eń aldymen azamattarymyzdyń ómiri men densaýlyǵyn saqtaýdyń múddesi basym bolýǵa tıis", - dep túıindedi Erjan Sádenov.