Almatyda tikeleı ınvestısıa qoryn qurý týraly úshjaqty kelisimge qol qoıyldy. Saltanatty rásim halyqaralyq New Vision Forum 2025 forýmynyń aıasynda ótti, - dep habarlaıdy Aqshamnews.kz.
Kelisimge Almaty Creative kreatıvti ındýstrıalardy damytý ortalyǵy, Freedom Holding Corp. jáne VPE Capital Fund Management Limited qol qoıdy.
Creative Capital Fund qory kreatıvti ındýstrıalarda kásipkerlikti damytýǵa, Almatydaǵy joǵary shyǵarmashylyq áleýet pen óńirlik erekshelikti eskere otyryp, jańa múmkindikter ashýǵa baǵyttalǵan.
«Qordyń ınvestısıalary eksporttyq áleýeti joǵary baǵyttarǵa – kınoóndiris (beıne jáne anımasıa salalaryn qosa alǵanda), mýzyka, IT jáne geımdev, sáýlet, dızaın jáne sıfrlyq medıa salalaryna shoǵyrlanady», – dedi Almaty qalasy ákiminiń orynbasary Oljas Smaǵulov.
Qordyń bastapqy kapıtaly 21 mlrd teńge, onyń ishinde 10 mlrd teńge – jergilikti búdjetten, 11 mlrd teńge – jeke jáne sheteldik ınvestorlardyń qarajatynan quralady.
Qor Astana halyqaralyq qarjy ortalyǵynyń (AIFC) alańynda qurylyp, aǵylshyn quqyǵynyń ıýrısdıksıasynda jumys isteıdi. Qordyń qyzmet etý merzimi – 10 jyl, onyń ishinde 5 jyl ınvestısıalyq, 5 jyl postınvestısıalyq kezeń retinde belgilengen.
Aıta keteıik, qalalyq tikeleı ınvestısıa qoryn qurý bastamasy Qazaqstan Prezıdenti Qasym-Jomart Toqaevtyń 2022 jylǵy 16 qarashadaǵy qoldaýyna ıe bolǵan.
Bul bastama 2021–2025 jyldarǵa arnalǵan kreatıvti ındýstrıalardy damytý tujyrymdamasynda jáne Almaty qalasyn 2025 jylǵa deıin jáne 2030 jylǵa deıingi orta merzimdi damý baǵdarlamasynda kórinis tapqan.
Qordyń basty maqsaty – almatylyqtardyń shyǵarmashylyq ıdeıalaryn turaqty bızneske aınaldyrý jáne qalanyń kreatıvti ındýstrıalar ekojúıesin damytý.