Indýstrıa jáne ınfraqurylym
Jańa jylytý kezeńine búdjettik uıymdar men turǵyndar úshin 9,6 mln tonna kómir berý josparlanǵan. Bul týraly QR Indýstrıa jáne ınfraqurylymdyq damý mınıstrligi Indýstrıalyq damý komıtetiniń tóraǵasy İlıas Ospanov aıtyp berdi, dep habarlaıdy Almaty-akshamy.kz QazAqparat-qa silteme jasap.
«Komýnaldyq-turmystyq sektor men halyq úshin negizgi kómir óndirýshiler – Shubarkól men Qarajyra bolyp otyr. Bıylǵy 7 aıda halyqqa jáne búdjettik uıymdarǵa 4,5 mln tonna kómir tıelgen, bul ótken jylǵy kezeńnen 10%-ǵa kóbirek. Ótken jyly aýa raıynyń erte salqyndaýynan keı óńirlerde kómir satyp alýǵa úlken kezek bolǵany belgili, bul halyqtyń dúrligýine sebep boldy. Bıyl oǵan jol bermeý kerek», - dedi İlıas Ospanov Ortalyq komýnıkasıalar qyzmetinde ótken baspasóz máslıhatynda.
Spıkerdiń aıtýynsha, óńirler, sonyń ishinde turǵyndardyń ózi kómir qoryn ýaqytyly satyp almaǵany anyqtaldy. Ekinshi sebep – suranystyń shamadan tys kóbeıip, júktemeniń artýy.
«Kelesi jylytý kezeńine (2022-2023 jyldar) halyqty kómirmen aldyn ala qamtamasyz etýge daıyndyq bıylǵy naýryz aıynda, ótken jylytý maýsymynan keıin bastaldy. Barlyq turǵyndardy sýyq túskenshe kómir qoryn satyp alýǵa keńes beremin», - dedi İlıas Ospanov.
Mınıstrlik aldaǵy jylytý kezeńine búdjettik uıymdar men turǵyndar úshin kómir qajettiligi josparyn qurǵan.
«Osy josparǵa sáıkes shamamen 9,6 mln tonna kómir tutynylady, onyń ishinde komýnaldyq-turmystyq sektorǵa – 2,6 mln tonna, turǵyndarǵa – 7 mln tonna kómir qarastyrylǵan. Turǵyndardan basqa, búdjettik uıymdar men strategıalyq nysandar da sol kómirdi paıdalanatynyn eskerý qajet», - dedi komıtet tóraǵasy.