Qazaqstanda jylý energetıkasy salasyndaǵy mamandyqtarǵa qyzyǵýshylyq qaıta kúsheıip otyr. Bul týraly energetıka vıse-mınıstri Suńǵat Esimhanov Úkimet otyrysynyń qorytyndysy boıynsha ótken baspasóz máslıhatynda málimdedi.
Vıse-mınıstrdiń aıtýynsha, bıyl bul salaǵa túsken túlekterdiń sany buryn-sońdy bolmaǵan kórsetkishke jetken.
«Biz sońǵy eki jylda energıa óndiretin kásiporyndardaǵy ortasha jalaqyny 420-450 myń teńgege deıin kóterdik. Sonyń nátıjesinde mamandardyń ketýi toqtady. Bıylǵy jyly Ǵylym jáne joǵary bilim mınıstrligimen birlesip granttar sanyn ulǵaıtyp, alǵash ret Almaty energetıka jáne baılanys ýnıversıtetine (AEBÝ) 200 stýdent tústi. Bulaı eshqashan bolǵan emes. Sondyqtan salaǵa mamandardy qaıta tartýǵa múmkindik bar. Árıne, jaqsy energetıkti birneshe jyl baýlý qajet. Bul úrdis bizdiń baqylaýymyzda bolady, sondyqtan kadrlyq áleýetti qalpyna keltirý bastaldy dep aıta alamyz», – dedi ol.
Jylý energetıkasy — eldiń energetıkalyq qaýipsizdigi men turaqty damýy úshin mańyzdy salanyń biri. Sońǵy jyldary energetıkalyq nysandarda jańǵyrtý jumystary júrgizilip, jańa qondyrǵylar engizilýde. Bul óz kezeginde bilikti kadrlarǵa degen suranysty arttyrýda.
Sarapshylardyń aıtýynsha, energetıka salasyndaǵy eńbekaqynyń kóterilýi, áleýmettik kepildikterdiń jaqsarýy jáne memlekettik qoldaý sharalary jas mamandardyń qyzyǵýshylyǵyn arttyryp otyr.
Sonymen qatar, bıylǵy «Jumysshy mamandyqtary jyly» aıasynda tehnıkalyq baǵyttaǵy granttar kólemi aıtarlyqtaı kóbeıip, jylý energetıkasy salasyna jańa serpin bermek.