Qazaqstanda ekologıalyq tepe-teńdikti saqtaý jáne orman alqaptaryn keńeıtý baǵytynda aýqymdy jumystar atqarylyp jatyr. Bul sharalar Memleket basshysynyń «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Joldaýyn jáne Prezıdenttiń tabıǵatty qorǵaý jónindegi tapsyrmalaryn júzege asyrý aıasynda qolǵa alynǵan.
QR Ekologıa jáne tabıǵı resýrstar mınıstri Erlan Nysanbaevtyń málimetinshe, sońǵy jyldary el aýmaǵynda 1 mlrd 369 mln-nan astam kóshet egildi. Onyń ishinde Aral teńiziniń qurǵaǵan túbine 48,7 mln dana sekseýil kósheti otyrǵyzylǵan. Bul joba óńirdegi ekologıalyq apat saldaryn jumsartýǵa baǵyttalǵan.
— «Memlekettik orman qory aýmaǵyna aýqymdy kólemde aǵash otyrǵyzý jumystary júrgizilýde. Ásirese Aral teńiziniń qurǵaǵan aýmaǵyna sekseýil egý – shóleıttenýdi toqtatýdyń mańyzdy tetigi», — dedi mınıstr.
Orman sharýashylyǵyn turaqty damytý maqsatynda Qazaly aýdanynda byltyr jyl sońynda jańa orman pıtomnıgi iske qosyldy. Onyń aýmaǵy 33 gektardy quraıdy jáne jylyna 3 mln kóshet ósirýge múmkindik beredi. Qazirgi tańda agrotehnıkalyq talaptarǵa sáıkes pıtomnıktiń 10 gektaryna sekseýil tuqymy sebilgen.
Buǵan qosa, bıyl aýdany 15 gektar jańa pıtomnıkti jobalaý jáne Araldyń qurǵaǵan túbinde tikeleı uńǵymylar burǵylaý jumystary bastaldy. Bul sharalar jas kóshetterdiń ósýine qajetti sý qoryn qamtamasyz etýge baǵyttalǵan.
«Taza Qazaqstan» aıasyndaǵy kógaldandyrý jumystary:
-
eldegi orman alqaptarynyń kólemin ulǵaıtýǵa;
-
shóleıttenýdiń aldyn alýǵa;
-
halyq úshin ekologıalyq qolaıly orta qalyptastyrýǵa;
-
sý jáne aýa teńgerimin saqtaýǵa yqpal etedi.
Bul bastama Qazaqstannyń uzaq merzimdi ekologıalyq qaýipsizdigi men ornyqty damý strategıasynyń mańyzdy bóligine aınalyp otyr.