QR-kody arqyly tólemdi sol jerde jasaýǵa bolady
Astananyń HQO-da qujat alatyn termınaly iske qosyldy. Avtomattandyrylǵan óz-ózine qyzmet kórsetý termınaly bıometrıalyq júıemen, fotosýretke túsirý fýnksıasymen jáne arnaıy ınterfeıspen jabdyqtalǵan, dep habarlaıdy Almaty-akshamy.kz polisia.kz-ke silteme jasap.
Onyń kómegimen adam jeke kýálik nemese tólqujat alýǵa óz betinshe ótinish bere alady.
Qujattandyrý termınaly elordalyq HQKO-da pılottyq rejımde iske qosyldy. Jobany İİM men Sıfrlyq damý, ınovasıalar jáne aeroǵarysh ónerkásibi mınıstrligi birlesip ázirledi. Jańa HQKO-da 4 osyndaı qurylǵy jumys isteıtin bolady. Jańa apparatpen búgin İshki ister mınıstri Marat Ahmetjanov pen Sıfrlyq damý, ınovasıalar jáne aeroǵarysh ónerkásibi mınıstri Baǵdat Mýsın tanysty.
Bul tehnologıa memleket usynatyn qyzmetterdiń sapasy men jyldamdyǵyn arttyrady, qujattardy resimdeý merzimin edáýir qysqartady, sybaılas jemqorlyq táýekelderin azaıtady. Sebebi barlyq proses ashyq túrde júrgiziledi.
Qurylǵynyń kómegimen tek ótinish berip qana qoımaı, derekqordaǵy fotosýret boıynsha jeke basty sáıkestendirip, QR-kody arqyly tólemdi sol jerde jasaýǵa bolady.
Birneshe qadam jasaý jetkilikti:
- JSN jáne uıaly telefon nómirin engizý;
- sýretke túsirý jáne qol qoıý;
- ekrandaǵy QR-kodty paıdalanyp, memlekettik bajdy tóleý;
- SMS arqyly qalyptastyrylǵan qolhat alý;
- kóshi-qon qyzmetiniń qyzmetkerine ótinim nómirin daıyndaý úshin kórsetý.
Bul rette uıaly telefon nómirińizdi mobıldi azamattar bazasyna tirkeý qajet, biraq muny ótinimdi resimdeý kezinde de jasaýǵa bolady.
Aıta ketý kerek, búgin İİM termınal arqyly resimdelgen jeke kýálik daıyndady. Qanat Dáribaev jańa apparatty paıdalanǵan alǵashqy adam boldy.