Bul naýqan balalardyń qatysýymen bolatyn oqys oqıǵalardyń aldyn alýǵa baǵyttalǵan.
2025 jyldyń 20 naýryzy men 23 mamyry aralyǵynda elimizdiń barlyq balabaqshalarynda, mektepterinde jáne kolejderinde balalardyń qaýipsizdigin qamtamasyz etýge baǵyttalǵan respýblıkalyq aqparattyq kampanıa ótedi, dep habarlaıdy aqshamnews.kz.
Qaýipsizdik sharalaryn kúsheıtý jáne balalardyń jaraqattanýynyń aldyn alý maqsatynda QR Oqý-aǵartý mınıstrligi Balalardyń quqyqtaryn qorǵaý komıteti barlyq bilim berý uıymdarynda ata-analar jınalysynyń biryńǵaı kúnin ótkizý týraly jergilikti atqarýshy organdarǵa tıisti hattar joldady. Ata-analarmen kezdesýdiń negizgi taqyryby sý aıdyndaryndaǵy qaýipsizdik erejeleri men balalardyń terezeden qulaý jaǵdaılarynyń aldyn alý máseleleri bolmaq.
Jınalys barysynda ata-analarǵa arnaıy jadynamalar men ádistemelik usynymdar beriledi. Sonymen qatar, balalardyń jaraqat alýyna ákeletin negizgi sebepter – eresekter tarapynan baqylaýdyń jetkiliksizdigi, ruqsat etilmegen oryndarda shomylý jáne qaýipsizdik sharalarynyń saqtalmaýy jan-jaqty talqylanady. Osyǵan baılanysty balalardyń úıde, mektepte jáne kóshede qaýipsizdigin qamtamasyz etýge baǵyttalǵan aldyn alý sharalary usynylady.
Profılaktıkalyq jumystar eńbek ujymdary deńgeıinde de uıymdastyrylyp, oǵan pedagogter, bilim berý uıymdarynyń ókilderi, jergilikti atqarýshy organdar men balalardyń quqyqtaryn qorǵaý salasyndaǵy sarapshylar qatysady.
«Kóktemgi jyly kúndermen birge balalardyń belsendiligi de artady. Ókinishke qaraı, osy kezeńde túrli jazataıym oqıǵalar jıilep ketedi. Balalardyń qaýipsizdigi – bizdiń ortaq mindetimiz. Barlyq ata-analardy saqtyq sharalaryn kúsheıtýge, balalarǵa qaýipsizdik erejelerin túsindirýge jáne olardy qaraýsyz qaldyrmaýǵa shaqyramyn», – dep atap ótti QR Oqý-aǵartý mınıstrligi Balalardyń quqyqtaryn qorǵaý komıtetiniń tóraıymy Nasymjan Ospanova.
Kampanıa aıasynda «Qaýipsiz tereze» aksıasy da ótkiziledi. Onyń basty maqsaty – ata-analar men qoǵamnyń nazaryn úıdegi qaýipsizdik máselelerine aýdaryp, aldyn alý sharalary týraly aqparat berý.
Aıta keteıik, 2024 jyldan bastap zańnamaǵa engizilgen ózgeristerge sáıkes, barlyq qurylys kompanıalary jańa kópqabatty turǵyn úılerde terezelerge qorǵanysh qulyptaryn ornatýǵa mindetteldi. Bul talap ótken jyldan bastap paıdalanýǵa berilgen barlyq turǵyn úılerge qoldanylady jáne balalardyń qaýipsizdigin qamtamasyz etý jónindegi keshendi memlekettik sharalardyń biri bolyp tabylady.