Byltyr eldiń kórikti jerlerin jeti mıllıonǵa jýyq qazaqstandyq tamashalady.
Bul 2020 jylǵy sáıkes merzimdegi kórsetkishten 35% artyq. Al jahandyq pandemıaǵa deıingi kezeńmen salystyrǵanda 5% kóbirek, dep habarlaıdy Almaty-akshamy.kz Qazaqtv.com saıtyna silteme jasap.
Bul týraly «Qazaq Týrızm» ulttyq kompanıasynyń ókili Ernur Kenjebekov málimdedi. Onyń aıtýynsha, el ishindegi saıahatshylar aǵynnyń ósýi eń aldymen, turǵyndardyń ózimizdiń ulttyq parkterge degen qyzyǵýshylyǵy arta túskenin bildiredi.
«Ótken jyldarǵa qatysty aıtar bolsaq, Ulttyq parkterde adamdardyń kelýi boıynsha rekord ornady. Adamdardyń tabıǵaty ásem jerlerge barý belsendiligi artyp keledi. Ásirese, suranysqa ıe týrısik baǵyttar Almatynyń taý bókterlerinde, Býrabaı, Baıanaýyl, Kókshetaý jáne Qarqaraly aımaqtarynda ornalasqan. Ondaǵy ulttyq parkterge byltyr adamdar jıi sapar shegip, saıahatshylar shoǵyry kóbeıgen. Mańǵystaý men Túrkistan qalalyq týrızmi de qarqyndy damyp barady», - dedi «Kazakh Tourism» UK AQ ókili Ernur Kenjebekov.
Maman sózinshe, sońǵy kezderi otandyq saıahatshylardyń deni Qazaqstannyń jańa qurylǵan úsh óńirinde ornalasqan kórikti mekenderdi aralap, serýen qurǵandy jón kóredi.
«Osy baǵyttar boıynsha daıyn týrısik ónimder bar. Mysaly, Abaı oblysyndaǵy Semeı qalasynda Uly aqynnyń týǵan jerine baryp, jolshybaı taǵy da birqatar týrısik nysandarǵa soǵyp ketýge bolady. Keıin Qońyr áýlıe úńgiri syndy kıeli mekenderge aıaldaý qarastyrylǵan. Iaǵnı mundaǵy týrısik nysandarǵa suranys artyp keledi. Ol jerlerge ózińiz nemese týroperatorlar arqyly baǵyttar quryp barýǵa bolady. Olarda Kıds goý frı sıaqty memlekettik qoldaý sharasy qoldanylady. Ol demalysta otbasymen saıahattaýǵa jáne balalar áýe bıletterin únemdeýge múmkindik beredi», - deıdi «Kazakh Tourism» UK AQ ókili Ernur Kenjebekov.
Aıta keteıik, atalǵan baǵdarlama Qazaqstanda bıyl iske qosyldy. Bul eki jastan 14 jasqa deıingi balalarǵa eldiń negizgi áýe baǵyttaryna tegin ushýǵa múmkindik beredi. Buǵan deıin «Qazaq týrızmi» habarlaǵandaı, baǵdarlamany engizý qazaqstandyqtardyń demalys shyǵynyn ortasha eseppen 30% únemdeýge múmkindik beredi.