Temirjol jelisin iske qosý otandyq ónimniń eksportyn ulǵaıtýǵa baǵyttalǵan.
Qaraǵandyda iri temirjol jobasynyń qurylysy bastaldy, dep habarlaıdy Almaty-akshamy.kz Primeminister.kz silteme jasap.
Uzyndyǵy 836 km jańa temirjol jelisin iske qosý otandyq ónimniń eksportyn ulǵaıtýǵa baǵyttalǵan. Qurylys barysynda 419 qurylys nysany - 5 iri kópir, 87 shaǵyn jáne orta masshtabtaǵy kópir, 288 sý júrgizý qubyry, 14 avtojol ótkeli júrgiziledi. Qurylysty tolyq aıaqtaý 2025 jyldyń 4-toqsanyna josparlanǵan.
Jumysty iske qosý rásimine Premer-Mınıstr Álıhan Smaıylov onlaın rejımde qatysty.
Óz sózinde Úkimet basshysy osyndaı strategıalyq mańyzy bar joba Memleket basshysynyń tapsyrmasy boıynsha iske asyrylyp jatqanyn jáne respýblıkanyń kólik-tranzıt áleýetin damytýda mańyzy zor ekenin atap ótti.
Premer-Mınıstrdiń aıtýynsha, sońǵy bes jylda elimizde tranzıtpen konteıner tasymaldaý kólemi 4,4 ese ósti, bıylǵy 10 aıda eksporttaǵy júk aınalymy 74 mlrd tonna-kılometrden asty. Bul ótken jylmen salystyrǵanda 11%-ǵa artyq.
Temirjol salasynda birqatar iri ınfraqurylymdyq jobalardy iske asyrý týraly sheshim qabyldandy. Olardyń ishinde Dostyq – Moıynty, Baqty – Aıagóz, Darbaza – Maqtaaral, Almaty mańyndaǵy aınalma joldary bar.
«Mine, búgin sonyń biri ári iri joba Dostyq – Moıynty ekinshi temirjol qurylysyn bastaǵaly turmyz. Bul joba osy baǵytta ótkizý múmkindigin 5 esege arttyrýǵa múmkindik beredi jáne eksporttyq tasymal máselesin tolyq sheshedi», dedi Álıhan Smaıylov.
Jobany iske asyrý kezinde 80%-y Qazaqstannyń úlesine túsedi. Iaǵnı, shpaldardy, relsterdi, transformatorlardy jasaýdy, ınertti materıaldardy, qum men qıyrshyq tasty jetkizýdi jergilikti kompanıalar júzege asyrady. Sondaı-aq qurylysqa 3 700 adam jumyldyrylmaq, al temirjol jelisi paıdalanýǵa berilgen kezde 500 adam turaqty jumysqa ornalastyrylady.
Resmı sharaǵa ortalyq jáne jergilikti memlekettik organdar men birqatar qazaqstandyq iri kompanıa ókilderi, temirjolshylar men sala ardagerleri qatysty.