Muhtar Áýezov atyndaǵy kitaphanada "Kitaptar álemi" jobasynyń bes jyldyq mereıtoıy aıasynda jazýshy Saltanat Ábdiǵalıdyń "Janazyq" jáne "Kishkentaı áıel" kitaptarynyń tanystyrylymy ótti. Sharany Qazaqstannyń eńbek sińirgen qaıratkeri, M.O.Áýezov atyndaǵy Ádebıet jáne óner ınstıtýtynyń bas ǵylymı qyzmetkeri, jazýshy Nurdáýlet Aqysh júrgizip otyrdy.
Alǵashqy bolyp sóz sóılegen Qazaqstan Jazýshylar odaǵy Basqarma tóraǵasynyń orynbasary, Qazaqstannyń eńbek sińirgen qaıratkeri, aqyn Qasymhan Begmanov jas jazýshynyń aıaq alysy – qos kitaby qomaqty eńbek ekenine toqtalyp, aqjarma tilegin bildirdi. Al arnaıy Taraz qalasynan at terletip kelgen Qazaqstannyń eńbek sińirgen qaıratkeri, Halyqaralyq "Alash" ádebı syılyǵynyń laýreaty, jazýshy Kósemáli Sáttibaıuly men «Shalqar» radıosynyń dırektory, Halyqaralyq "Alash" ádebı syılyǵynyń laýreaty, jazýshy Bolatbek Tólepbergen "Kitaptar álemi" jobasynyń mańyzdylyǵyna toqtalyp, jetekshisi Saltanat Ábdiǵalıdyń "Janazyq" jáne "Kishkentaı áıel" kitaptarynyń kóterer júgi salmaqty ekenin aıtty.
Qazaqstannyń eńbek sińirgen qaıratkeri, dástúrli ánshi Ardaq Isataeva óz shákirtterimen ánmen shashý shashyp, sharanyń kórigin qyzdyra tústi. Jıynǵa sondaı-aq Saltanat Ábdiǵalı jetekshilik etetin "Kitap janashyrlary" klýbynyń eldegi jáne shet eldegi músheleri de qatysty. Túrkistan oblysy, Sozaq aýdanynan kelgen aqyn ári ustaz Tumartaı Dintaıuly, aqyn Nesibeli Shaıdazymova, Mońǵolıa eliniń Baıan-Ólgeı ólkesinen kelgen Tólegen Baıanhanuly, Shymkent qalasynan kelgen Rústem Kenjeuly, Túrkistan qalasynan kelgen qalamger Jibek Iskakovalar "Kitaptar áleminde" jobasynyń bes jyldyq sharasyn uıymdastyrǵan klýb jetekshisi Saltanat Amangeldiqyzyna shyǵarmashylyq tabys tilep, barsha klýb músheleri atynan rızashylyqtaryn bildirdi.
Jas jazýshy Saltanat Ábdiǵalıdyń "Kishkentaı áıel" atty prozalyq kitabyna búgingi kúnniń eń kókeıtesti máselelerin ózek etken "Ata ıisi", "Ákege hat", "Jalǵyzdyń muńy", "Kishkentaı áıel", "Baqytgúldiń bir kúni" ispetti týyndylary engen. Jınaqtaǵy taǵdyrdyń taýqymetin jalǵyz tartqan áıelderdiń, ákege degen saǵynyshtary júrekterin syzdatqan balalardyń beınesi shynaıy sýrettelgen.
Barshanyń nazaryn kitapqa aýdaryp, úlken ıgilikti ispen aınalysyp kele jatqan Saltanat Ábdiǵalıdyń «Kitaptar álemi» jobasyna bes jyl tolýyna oraı «Janazyq» kitaby jaryq kórgen. Osy joba aıasynda ómirge kelgen «Kitap janashyrlary» klýbynyń oqyrmandardy kóbeıtý jolyndaǵy san qyrly izdenisteri kóńilge qýanysh uıalatyp, bolashaqqa degen úmitti oıatady.
Osy ýaqyttyń ishinde kitap súıer qaýym erekshe yqylaspen qatysqan oqyrmandar arasynda "Birge kitap oqıyq!" onlaın báıgesine, "Jarysa kitap oqıyq!" baıqaýyna jáne "Áserli áńgime" onlaın baıqaýymen qatar, mektep jasyndaǵy balalar arasyndaǵy "Birge kitap oqıyq" onlaın báıgesine elimizdiń barlyq aımaqtarynan jasóspirimderdiń erekshe ynta-yqylaspen qatysqandyǵy qýantady. Oqyrman yqylasyn sátti paıdalanǵan Saltanat Ábdiǵalı «Kitap janashyrlary» klýbyn quryp, qataryna qalyń nópir múshelerin jınaǵan. Onda túrli mamandyq ıeleri: qalamger de, kásipker de, ustaz da, qurylysshy da, shashtarazshy da t.b. bar. Bul topty jetekshisi Saltanat Ábdiǵalı arnaıy qurylǵan áleýmettik jelileri arqyly túrli sharalar uıymdastyra otyryp, qyzyqty etip júrgizip keledi.
Qoǵamdy kitap oqýǵa úndep kele jatqan Saltanat Ábdiǵalı áleýmettik jeliniń múmkindigin qazaq kitabyn nasıhattaýdyń jaqsy bir quralyna aınaldyrǵan «Kitaptar álemi» jobasynyń jumystary «Janazyq» kitabyna ózek bolǵan. Áleýmettik jelilerindegi paraqshalarynda birde óleń men áńgime oqyp, birde aqyn-jazýshylarmen podkast túsirip, suhbatyn jarıalaǵan, birde maqal-mátel, jumbaq t.b. jasyryp, qara úzip, úzdik shyqqandaryna aqshalaı syılyqtar men kitaptar taratqan joba jumysy «Janazyq» jınaǵynyń oqyrmandaryna qyzǵylyqty bolmaq.