Almatyda taza da jaıly ómir súrýge qolaıly qala keńistigin qalyptastyrý jumystary júıeli túrde jalǵasyp keledi. Sol ıgi bastamalardyń biri atmosferalyq aýany qorǵaýǵa arnalǵan jańa erejeler jobasyn ázirleý, ıaǵnı «Atmosferalyq aýany qorǵaý salasyndaǵy arnaıy ekologıalyq talaptardy engizý týraly» qujat. Qujat bıyl tamyz aıynda qoǵamdyq talqylaýdan ótti.
Jobanyń basty maqsaty – megapolıstegi aýanyń lastaný deńgeıin júıeli túrde tómendetý. «Renesans plús» kompanıasynyń dereginshe, zıandy shyǵaryndylardyń shamamen 60 paıyzy avtokólikten shyǵady. Qalǵan bóligi jeke turǵyn úıler ónerkásip oryndary, monsha men káýaphana, qoǵamdyq tamaqtaný nysany men qurylys alańdary syndy stasıonarlyq lastaný kózderiniń qyzmetimen baılanysty.
Bul erejeler jobasy qalanyń bolashaq ekologıalyq saıasatynyń berik irgetasy. Onyń negizinde zıandy shyǵaryndyny azaıtýǵa, aýa sapasyn jaqsartýǵa baǵyttalǵan naqty qadamdar men tetikter kezeń-kezeńimen júzege aspaq. Usynylǵan sharalardyń arasynda óndiris oshaqtaryn jańǵyrtý, ekologıalyq taza otyn túrlerine kóshý sekildi mańyzdy baǵyttar bar.
Erejeler jobasyn qabyldaý men júzege asyrý qalanyń ekologıalyq jaǵdaıyn jaqsartyp, almatylyqtardyń ómir súrýge barynsha qolaıly jaǵdaı týǵyzýǵa jol ashady.
Sonymen qatar, qala turǵyndary aýa sapasy eń aldymen kólik sany men ár azamattyń tabıǵatqa degen kózqarasyna baılanysty ekenin aıtady. «Taza aýa aımaǵy» jobasy aıasynda júrgizilgen saýalnama barysynda keıbir turǵyndar taza aýamen tynystaý úshin taýǵa shyǵýǵa májbúr ekenin jetkizgen. Olardyń pikirinshe, ekologıalyq ahýaldy jaqsartý birlesken kúsh-jigerdiń nátıjesinde ǵana júzege asatyn ortaq is. Sebebi, bul álemdik másele.