"Sport federasıalary óz betinshe ashylady jáne respýblıkalyq birlestikterden oqshaý ómir súredi.
Al olardyń bapkerleri jas balalardy jattyǵýǵa tartyp, jetkinshekterdiń densaýlyǵyna zıan tıgizýi múmkin", - dep esepteıdi senator Ǵalıasqar Sarybaev.
Senator Ǵalıasqar Sarybaev elimizdiń sport salasynda qalyptasqan jaǵdaıdy synǵa aldy. Bul týraly ol elimizdiń Premer-Mınıstrine joldaǵan depýtattyq saýalynda jarıa etti, dep habarlaıdy Almaty-akshamy.kz 24.kz-ke silteme jasap.
Senator qazirgi ýaqytta sporttaǵy balalardyń júktemesine alańdaýly. Mundaı jaǵdaı, ásirese, jekpe-jek ónerinde keń taralǵan. Ol: «Jas urpaqtyń densaýlyǵyna teris áser etedi», – deıdi.
Osy oraıda depýtat jattyqtyrýshylar men tóreshilerdi tirkep, qyzmetin lısenzıalaýdy usyndy. Al balalarǵa tárbıe-jattyǵý ádistemelerin daıyndaý kerektigin alǵa tartty.
«Jattyǵýshylar balalardy erte jastan sportqa tartý tendensıasyn qalyptastyrdy. Tipti qazirgi kezde elimizde belgilengen jas erekshelikteri múldem saqtalmaı otyr. Jarystarda keıbir ádiletsiz tóreshilerdiń kesirinen keıbir sportshylardyń saǵy synyp, sportpen qoshtasýda. Taǵy bir eskeretin jaǵdaı, buryn balalar men jasóspirimderdiń jylyna qansha jarysqa qatysýyna bolatyndyǵyn retteıtin normalar bolǵan. Qazirgi ýaqytta bizdiń elimizde mundaı normalar qabyldanbaǵan. Osyndaı jaǵdaılar federasıalardyń óz betimen ashylyp, jumys istep jatqandyǵy da áseri», - dedi QR Parlamenti Senatynyń depýtaty Ǵalıasqar Sarybaev.