Qazaqstanda jyl basynan beri qanaınalym júıesi aýrýlarynan bolatyn ólim-jitim 8,5%, onyń ishinde júrektiń ıshemıalyq aýrýy 12%, jiti mıokard ınfarktisi 4,6%, stenokardıa 10%, ınsýlt-13,5% tómendedi.
Bul rette ótken jyldyń uqsas kezeńimen salystyrǵanda ashyq júrekke jasalatyn operasıalar sany elimiz boıynsha 7,1% ósti, dep habarlaıdy Almaty-akshamy.kz
Jyl basynan beri 6 148 ashyq júrekke operasıa jasaldy, júrekke ıntervensıalyq aralasýlar sany 14% artyp, 55 000-nan astam aralasýdy qurady, bul 2022 jyldyń sáıkes kezeńimen salystyrǵanda 6 500-ge ósti.
"Respýblıkada alǵash ret Ulttyq ǵylymı kardıohırýrgıalyq ortalyqtyń bazasynda aýyr sozylmaly júrek jetkiliksizdigi (SJJ) bar pasıentterdi emdeý úshin biregeı joǵary tehnologıalyq kardıohırýrgıalyq operasıalar engizildi. Mundaı operasıalarǵa qanaınalymyn uzaq mehanıkalyq qoldaý qurylǵysyn – júrektiń jasandy sol jaq qarynshasyn ımplantattaý jatady. 10 jyldyń ishinde kardıohırýrgıa ortalyǵyna osyndaı 460 qurylǵy ımplantattaldy, tek bıylǵy jyly 18 pasıent kiriktirilgen apparattardyń arqasynda ómir súrý múmkindigine ıe boldy",-dep habarlaıdy Densaýlyq saqtaý mınıstrligi.
Qazaqstanda barlyǵy 13 kardıohırýrgıalyq ortalyqta/bólimshede 602 qolqa qaqpaqshasyn ımplantattaý júrgizildi. Onyń ishinde 2023 jyldyń birinshi jartyjyldyǵynda 80 transkateterlik TAVI qolqa qaqpaqshasyn ımplantattaý oryndaldy.
Qazaqstan - Ortalyq Azıadaǵy júrek pen ókpeni transplantattaý júrgiziletin jalǵyz el. Keıingi 10 jylda UǴKO bazasynda donorlyq júrekti transplantattaý boıynsha 86 operasıa jasaldy. Sonymen qatar bıyl shilde aıynda alǵash ret "Shymkent júrek ortalyǵy" KeAQ jáne "Kardıologıa jáne ishki aýrýlar ǵylymı-zertteý ınstıtýty" AQ qabyrǵalarynda eki pasıentke júrekti transplantattaý sátti júrgizildi.