Imperatorlyq pıngvınder jer betinen joıylyp ketýi múmkin. Ǵalymdar osylaı dep dabyl qaǵyp otyr.
Olardyń alańdaýy beker emes. Óıtkeni sońǵy zertteý nátıjeleri kórsetip otyrǵandaı, byltyr 10 myńdaı balpanaq qyrylyp qalǵan, dep habarlaıdy Almaty-akshamy.kz 24.kz-ke silteme jasap.
Ǵalymdar Antarktıkadaǵy Bellınsgaýzen teńizindegi ımperatorlyq pıngvınderdi baqylaǵan. Bul teńiz qustarynyń ishindegi eń irileri. Byltyr solardyń 10 myń balapany qyrylyp qalǵan. Óıtkeni olardyń tirshilik etýi úshin qajetti muz tez juqaryp barady. Sóıtip qanaty áli qatpaǵan balapandar sýǵa qulap, óz betinshe júze almaı, ólip qalady eken.
Norman Retklıff, brıtandyq antarktıkalyq qyzmetiniń ókili: - Biz ımperatorlyq pıngvınderdiń 5 tirshilik etý aımaǵyn baqyladyq. Mundaı jaǵdaı solardyń tórteýinde tirkelgen. Byltyr tek bir aımaqta ǵana balapandar tiri qalǵan.
Buǵan klımattyń ózgerýi sebep deıdi mamandar. Rekordtyq temperatýra saldarynan muz qatyp úlgermeıdi. Ádette mınýs 50 gradýs bolatyn kezde byltyr Antarktıdada mınýs 10 gradýs bolǵan.
Norman Retklıff, brıtandyq antarktıkalyq qyzmetiniń ókili: - Búkil Antarktıda boıynsha 2,7 mıllıon sharshy shaqyrym muz erip ketken. Bul Ulybrıtanıa aýmaǵynan 10 ese kóp. Keıingi 45 jylda mundaı jaǵdaı alǵash ret tirkelip otyr.
Antarktıdada ımperatorlyq pıngvınderdiń 62 meken etý aımaǵy belgili. 2018-2022 jyldar aralyǵynda solardyń 30 prosentine muzdyqtardyń erýi áser etken. Jaǵdaı osylaı jalǵasa berse, osy ǵasyrdyń sońyna taman ımperatorlyq pıngvınderdiń 90 paıyzy jer betinen joıylyp ketedi deıdi ǵalymdar. Olar mundaı jaǵdaıdy boldyrmaý úshin eń bastysy atmosferaǵa bólinetin zıandy gazdardyń mólsherin kúrt azaıtý kerek ekenin taǵy da aıtady.