Qazaqstan Respýblıkasynyń Mádenıet jáne aqparat mınıstrliginde genderlik sezimtal búdjetti (GSB) engizý máselesine arnalǵan otyrys ótti. İs-sharaǵa Qazaqstan Respýblıkasy Prezıdenti janyndaǵy Áıelder isteri jáne otbasylyq-demografıalyq saıasat jónindegi ulttyq komısıanyń ókili Juldyzaı Ysqaqova, QR Parlamentiniń depýtattary, elimizdegi BUU-Áıelder qurylymynyń ókilderi, sondaı-aq genderlik saıasat salasyndaǵy halyqaralyq sarapshylar qatysty.
Kezdesý barysynda Qazaqstandaǵy qazirgi jaǵdaıǵa jasalǵan taldaý nátıjeleri men halyqaralyq standarttar men ozyq tájirıbelerdi eskere otyryp ázirlengen GSB engizý jónindegi jol kartasynyń jobasy talqylandy, dep habarlaıdy aqshamnews.kz.
Atalǵan bastama barlyq deńgeıdegi búdjetterdi tıimdi josparlaý júıesin ázirleý, zańnamalyq bazany jetildirý, genderlik saraptama engizý, memlekettik organdar qyzmetkerleriniń biliktiligin arttyrý jáne basqa da baǵyttardy qamtıdy.
Genderlik sezimtal búdjetti engizý Qazaqstan Respýblıkasynyń 2030 jylǵa deıingi Otbasylyq jáne genderlik saıasat tujyrymdamasynda belgilengen. Bul bastama áleýmettik ádiletti búdjetti qalyptastyrýǵa jáne ınklúzıvti qoǵam qurýǵa baǵyttalǵan.
Aıta ketý kerek, genderlik sezimtal búdjetteý – búdjetti josparlaý kezinde áıelderge qandaı da bir artyqshylyq berý emes, áıelder, jastar, balalar men áleýmettik osal toptardyń múddelerin barynsha eskerý arqyly búdjet qarajatynyń tıimdiligin arttyrýǵa múmkindik beredi.