Forvardtyq satyp alý kólemi 2 esege artty.
Bıyl forvardtyq satyp alý kólemi 2 esege artty. Bul týraly Májilistiń jalpy otyrysynda QR Aýyl sharýashylyǵy mınıstri Erbol Qarashókeev málim etti, dep habarlaıdy Almaty-akshamy.kz QazAqparatqa silteme jasap.
«Ózderińizge málim, sońǵy ýaqytta aýyl sharýashylyǵy óndirisine arnalǵan taýarlyq-materıaldyq qundylyqtardyń birneshe ese qymbattaýy baıqalýda. Osyǵan baılanysty, qazirgi ýaqytta kóktemgi dala jáne egin jınaý jumystaryn qarjylandyrý kólemin qosymsha 70 mlrd teńgege ulǵaıtyp, búdjettik kredıt berýdiń jalpy kólemin 140 mlrd teńgege jetkizý máselesi pysyqtalýda. Azyq-túlik kelisimshart korporasıasynyń forvardtyq satyp alý baǵdarlamasy arqyly 80 mlrd teńge kóleminde jeńildetilgen kredıtpen qamtamasyz etilgen. Bul rette, aǵymdaǵy jyly forvardtyq satyp alý kólemi 2 esege artty», - dedi Erbol Qarashókeev.
Sonymen qatar ol, 1 sáýirdegi jaǵdaı boıynsha, «Keń dala» baǵdarlamasy boıynsha 63,1 mlrd teńge somasyna ótinimder qarjylandyrylǵanyn aıtty. Munymen qosa, sondaı-aq Azyq-túlik kelisimshart korporasıasy 57,2 mlrd teńge somasyna ótinimderdi qarjylandyrdy. Budan basqa, 200 myń tonna kóleminde tuqymdyq astyq qoryn qalyptastyrý úshin forvardtyq satyp alýǵa 20 mlrd teńge bólý máselesi pysyqtalyp jatyr. 2021 jylǵy qurǵaqshylyq qaıtalanǵan jaǵdaıda, mal men qus basynyń saqtalýyn qamtamasyz etedi.
Ákimdikterdiń derekteri boıynsha 2022 jyly jalpy egis kólemi 23,1 mln gektardy quraıdy, bul 2021 jylmen salystyrǵanda 125 myń gektarǵa artyq.
Aıta keteıik, búgin Májilistiń jalpy otyrysynda óńirlerge shyǵý barysynda QR Parlamenti Májilisiniń depýtattaryna kelip túsken azamattardyń ótinishterin memlekettik organdardyń qaraý nátıjeleri talqylanyp jatyr. Depýtattardyń óńirlerge saparlary barysynda kóterilgen eki myńǵa jýyq suraq Úkimet tarapynan jan-jaqty saraptalyp, qaraldy.