Úkimet medısınalyq kómekke qoljetimdilik teńsizdigin qysqartýdy kózdep otyr.
Elimizde 1,5 mln aýyl turǵyny medısınalyq saqtandyrýmen qamtylmaǵan. Bul týraly Májilistiń jalpy otyrysynda aıtyldy, dep habarlaıdy Almaty-akshamy.kz QazAqparatqa silteme jasap.
«1,5 mln aýyl halqy medısınalyq saqtandyrýmen qamtylmaǵan. Bul máseleni sheshý úshin qala men aýyl turǵyndary arasyndaǵy medısınalyq kómekke qoljetimdilik teńsizdigin qysqartý maqsaty tur. Sol úshin bıyl aýyl turǵyndaryn, onyń ishinde birinshi kezekte balalardy keshendi profılaktıkalyq tekserýden ótkizý bastalady. Ekinshiden, 2025 jylǵa deıin aýyldyq jerlerde 420 medısınalyq mekeme salý, aýyldyq dárihana pýnktterin qurý júzege asyrylady», - dedi Eraly Toǵjanov.
Sondaı-aq, ol ana men bala densaýlyǵyn qorǵaý máselelerin naqty sheshý úshin 20 aýdanaralyq perzenthana, 17 dıagnostıkalyq ortalyq ashylatynyn aıtty.
«Kadr tapshylyǵyn azaıtý maqsatynda dárigerlerdiń, orta medısına qyzmetkerleriniń jalaqysy kóterildi. 2022 jyly tapshy mamandyqtar boıynsha granttar sany 43%-ǵa ulǵaıtyldy jáne medısına qyzmetkerleriniń jaýapkershiligin saqtandyrý kózdelip otyr. Osy sharalar nátıjesinde 2025 jylǵa qaraı aýyldyq eldi mekenderdi konsýltasıalyq-dıagnostıkalyq kómekpen qamtý 47 den 100%-ǵa deıin jetkiziledi», - dedi Premer-Mınıstrdiń orynbasary.