Qazaqstanda el-jerdi aralap, shoý-baǵdarlama qoıatyn sırkter men janýarlardy ustap kórýge múmkindik beretin kishigirim zoobaqtardyń jumysyna túbegeıli tyıym salyndy.
Mundaı shekteý kóshpeli okenarıým men delfınarıılerge de qatysty, dep habarlaıdy aqshamnews.kz.
Endi jan-janýarlar men balyqtardy júk kóligine tıep alyp, aılap gastróldik saparmen aýyl-aımaqty aralaı almaıdy. Jańa erejeni elemegenderge qomaqty aıyppul salynady. Ekologıa mınıstriniń mamandary "bul norma eń aldymen qaýipsizdik úshin jasalyp otyr" dedi.
"Jyljylmaly sırkterde janýarlarǵa tıisti jaǵdaı kórsetilmeıdi. Óıtkeni múmkin emes. Olar kóship-qonyp júredi. Ártúrli aýrý taratýy múmkin. Aýyryp qalsa, halyqpen kezdesken kezde adamdarǵa juǵýy múmkin degen qaýipter bar. Sol sebepti osyndaı norma engizildi", - dedi QR Ekologıa jáne tabıǵı resýrstar mınıstrligi basqarmasynyń bas sarapshysy Baqytjan Isahaev.
Al eger bul erejeni elemeı, óz betinshe saıabaqtar men parkterde janýarlardy ustap júrip qyzmet kórsetse nemese jekemenshigindegi janýarlarmen eldi aralap, sırk uıymdastyrsa, jeke tulǵaǵa 40 myń teńgege jýyq, al zańdy tulǵaǵa 100 myń teńgeden kóp aıyppul salynady.
"Tekseretin arnaıy organ joq. Al eger aryz-shaǵym túsip jatsa, tıisti organdarmen birlesip, tekserý júrgizýge bolady. Ákimshilik nemese basqa da jaýapkershilikke tartýǵa bolady", - dedi Baqytjan Isahaev.