Osy jyldyń 1 sáýirine deıin azamattar 2024 jyldyń avtokólik salyǵyn tóleýi tıis. Bul rette salyq somasy byltyrǵy aılyq eseptik kórsetkish (AEK) mólsherimen esepteledi. Byltyr AEK – 3692 teńge boldy. Bıylǵy mólsheri – 3932 teńge, dep habarlaıdy aqshamnews.kz
Salyq kodeksiniń 492 babyna sáıkes, avtokóliktiń salyq somasy AEK-ke jáne salyq mólsherlemesine baılanysty. Salyq mólsherlemesi kóp jaǵdaıda kóliktiń qozǵaltqysh kólemine jáne el aýmaǵyndaǵy alǵashqy tirkeý jylyna táýeldi bolady.
Qozǵaltqysh kólemi 3000 sm kýbqa deıingi jeńil kólikterdiń salyq mólsherlemesi tek AEK-ke baılanysty jáne 1 men 9 AEK aralyǵynda ǵana bolady (ıaǵnı 3692 men 33 228 teńge aralyǵynda).
Qozǵaltqysh kólemi 3000 sm kýbtan 4000 sm kýbqa deıingi, el aýmaǵyna 2013 jyldyń 31 jeltoqsanyna deıin ákelingen kólikterdiń salyq mólsherlemesi – 15 AEK (2024 jyl úshin – 55 380 teńge).
Al qozǵaltqysh kólemi 4000 sm kýbtan asyp ketetin avtomobılderdiń salyq mólsherlemesi 117 AEK-ti (2024 jyl úshin – 431 964 teńge) quraıdy.
Elge 2014 jyldan bastap ákelingen kólikterdiń salyq mólsherlemesi basqasha esepteledi. 2013 jyldyń 31 jeltoqsanynan keıin el aýmaǵyna ákelingen, qozǵaltqysh kólemi 3000 sm kýbtan asatyn kólikterdiń salyǵy 35-200 AEK (129 220 teńge – 738 400 teńge) aralyǵynda bolady.
2026 jylǵy salyq 2025 jylǵy AEK-pen esepteledi. Sonymen qatar bıyl nemese kelesi jyly Salyq kodeksi jańartylmaq. Jańa redaksıada shyǵarylǵanyna 10 jyldan asqan kólikterdiń salyǵyn – 30%-ǵa, 20 jyldan asqan kólikterdiń salyǵyn 50%-ǵa tómendetý kózdelgen.