Qoldanystaǵy tólem júıesi komýnaldyq qyzmetterge tarıfterdiń ósýin tolyǵymen jabady.
Bul týraly Almaty qalasynyń Óńirlik komýnıkasıalar qyzmetiniń brıfıńinde Jumyspen qamtý jáne áleýmettik baǵdarlamalar basqarmasynyń basshysy Baýyrjan Jaýbasov málimdedi, de habarlaıdy aqshamnews.kz.
Tarıfterdiń ózgerýi Almaty qalasyndaǵy Ulttyq ekonomıka mınıstrliginiń Tabıǵı monopolıalardy retteý Komıtetiniń Departamentimen bekitilgenin atap ótken jón. Óz kezeginde qala ákimdigi HÁOT úshin ótemaqy qarastyrdy.
2023 jylǵy shildeden bastap iske asyrylatyn «Tarıfti ınvestısıalarǵa aıyrbastaý» baǵdarlamasy sheńberinde áleýmettik osal azamattardyń toǵyz sanatyn qamtıtyn ótemaqy algorıtmi engizildi. Olarǵa ardagerler, múgedekter, kóp balaly otbasylar, zeınetkerler jáne qoldaýdy qajet etetin basqa sanattar jatady. Búgingi tańda áleýmettik tólem mólsheri 0,8 AEK nemese 3 146 teńgeni quraıdy. Tólem alýshylar sany-141,7 myń adam, kórsetilgen kómektiń jalpy somasy – 5,4 mlrd.teńge.
Óz sózinde Baýyrjan Jaýbasov komýnaldyq ınfraqurylymdy jańǵyrtý qajettiligine jáne tarıfterdiń sózsiz ósýine qaramastan, qala úshin halyqtyń áleýmettik osal sanattaryn qoldaý basymdyq bolyp qalatynyn atap ótti.
«Aılyq eseptik kórsetkishtiń jyl saıynǵy 6,5% – ǵa ósýin eskere otyryp, HÁOT-ty qoldaý úshin qoldanystaǵy áleýmettik tólem tarıfterdiń aǵymdaǵy ósýin tolyǵymen jabady jáne qoldanystaǵy erejelerge sáıkes aýdan ákimdikteri kórsetetin bolady», - dep atap ótti spıker.
2025 jylǵy 1 qańtardaǵy jaǵdaı boıynsha Almatyda HÁOT-qa jatatyn 339 849 azamat turady, olardyń ishinde:
UOS ardagerleri-38 adam;
kópbalaly otbasylar-41 992 adam;
múgedektigi bar adamdar-29 456 adam;
zeınetkerler - 252 528 adam.
Esterińizge sala keteıik, « Tarıfti ınvestısıaǵa aıyrbastaý» baǵdarlamasy aıasynda 2025 jyldyń 1 aqpanynan bastap Almatyda sýmen jabdyqtaý jáne sý burý qyzmetteri boıynsha tarıfterge ózgerister engiziletin bolady. Bul sharalar qosymsha qarajat tartýǵa, jelilerdiń tozýyn azaıtýǵa, apattylyqty azaıtýǵa jáne qyzmet kórsetý sapasyn jaqsartýǵa baǵyttalǵan.