Bul týraly Premer-Mınıstr Álıhan Smaıylov málimdedi.
Bıyl ındýstrıa salasynda 1 trln teńgege 170 jańa ınvestısıalyq jobany iske qosý josparlanýda. Bul týraly Memleket basshysynyń tóraǵalyǵymen ótken elimizdiń áleýmettik-ekonomıkalyq damý máseleleri jónindegi keńeste Premer-mınıstr Álıhan Smaıylov málimdedi, dep habarlaıdy Almaty-akshamy.kz Úkimettiń baspasóz qyzmetine silteme jasap.
Álıhan Smaıylov atap ótkendeı, bıyl ekonomıkaǵa 18,3 trln teńge kóleminde negizgi kapıtalǵa ınvestısıa tartý mindeti tur. Jalpy quny 28,1 trln teńgege 873 jobadan turatyn ınvestısıalyq pýl pysyqtalýda. Sonymen qatar relokasıalaý sheńberinde 24 kompanıa Qazaqstanǵa kóshti, taǵy 43 kompanıa boıynsha jumys jalǵasýda.
«Indýstrıa salasynda bıyl 1 trln teńgege 170 joba iske qosylady. Osynyń esebinen 15 myńǵa jýyq jańa jumys ornyn ashý josparlanýda», – dep atap ótti Premer-mınıstr.
Onyń aıtýynsha, munaı-gaz salasynda Teńiz kenishinde Saǵalyq qysymdy basqarý jáne Bolashaq keńeıtý jobalaryn iske asyrý jalǵasýda, 5-shi kompresordyń qurylysy bastalyp, Qarashyǵanaqta qýaty jylyna 4 mlrd tekshe metr bolatyn taýarlyq gazdy daıyndaý jobasy pysyqtalýda.
Sonymen qatar Qashaǵan ken ornynda jalpy qýaty 1 mlrd tekshe metrden asatyn gaz óńdeý zaýytynyń qurylysy jalǵasýda jáne qýattylyǵy 4 mlrd tekshe metr bolatyn taǵy bir gaz óńdeý zaýytyn salý máselesi pysyqtalyp jatyr.