Shymkent munaı óńdeý zaýytynyń óndiristik qýatyn jylyna 6 mln-nan 12 mln tonnaǵa deıin arttyrý josparlanyp otyr. Bul týraly eldiń áleýmettik-ekonomıkalyq máseleleri jónindegi keńeıtilgen keńeste Úkimet basshysy Álıhan Smaıylov aıtty, dep habarlaıdy Almaty-akshamy.kz. QazAqparatqa silteme jasap.
Álıhan Smaıylov kómirsýtek shıkizatynyń resýrstyq bazasyn jáne ony ári qaraı óńdeý úshin óndiristik qýattardy ulǵaıtý boıynsha sharalar qabyldanyp jatqanyn atap ótti.
«İshki naryqta janar-jaǵarmaı tapshylyǵyn joıý úshin Shymkent munaı óńdeý zaýytynyń óndiristik qýatyn jylyna 6 mln-nan 12 mln tonnaǵa deıin arttyrý josparlanyp otyr. Zaýytty shıkizatpen qamtamasyz etý úshin Atyraý – Keńqıaq jáne Keńqıaq – Qumkól munaı qubyrlaryn keńeıtý jobalaryn júzege asyrý josparlandy», – dedi Premer-Mınıstr.
Onyń aıtýynsha, bıyl Jańaózen qalasynda jalpy qýaty 900 mln tekshe metr bolatyn jańa gaz óńdeý zaýytynyń qurylysy bastalady. Jalpy, gaz salasynda jylyna qosymsha 4 mlrd tekshe metrge deıin gaz alýǵa múmkindik beretin zańnamalyq normalar qabyldandy.
Condaı-aq Úkimet basshysy munaı-hımıa salasynda qýaty jylyna 319 myń tonna býtadıen jáne basqa ilespe taýarlardy óndirýge múmkindik beretin joba iske asyrylyp jatqanyn eske saldy. Bul rette qazirgi tańda qýaty jylyna 1,2 mln tonna bolatyn polıetılen óndirý boıynsha jobalaý jumystary júrgizilip jatyr. Investısıalardyń jalpy kólemi 8,7 mlrd dollardy quraıdy.