Bul týraly Májilistiń jalpy otyrysynda Ulttyq ekonomıka mınıstri Álibek Qýantyrov aıtty.
Búgin palatanyń jalpy otyrysynda «Qazaqstan Respýblıkasynyń keıbir zańnamalyq aktilerine Memleket basshysynyń jekelegen tapsyrmalaryn iske asyrý máseleleri boıynsha ózgerister men tolyqtyrýlar engizý týraly» zań jobasy birinshi oqylymda qaraldy. Qujatta búdjetaralyq máseleler eskerilgen, dep habarlaıdy Almaty-akshamy.kz QazAqparatqa silteme jasap.
«Búdjetaralyq qatynastardy odan ári reformalaý jónindegi jumys júrgizilýde. Reformanyń negizgi maqsaty – óńirlerdiń qarjylyq derbestigin kúsheıtý. Salyq túsimderiniń keıbir túrlerin, ıaǵnı olardyń turaqtylyǵy men jınaqtalý qaǵıdattaryn eskere otyryp, jergilikti deńgeıge berý usynylady», - dedi Á. Qýantyrov.
Budan basqa zań jobasynda jalpy sıpattaǵy transfertterdiń esepteýlerine beriletin aqparattyń anyqtyǵy úshin búdjettik baǵdarlamalar ákimshileriniń jaýapkershiligi qarastyrylǵan.
Sonymen qatar, memlekettiń ekonomıkalyq fýnksıalaryn jeke monopolıalyq operatorlardyń júzege asyrýyna zań júzinde tyıym salý jónindegi tapsyrmany iske asyrý qarastyrylǵan. Bul turǵyda memleket 100% qatysatyn zańdy tulǵalar ǵana monopolıalyq fýnksıalardy júzege asyra alatyn túzetýler usynyldy.
«Demek arnaıy quqyq sýbektisi uǵymy naqtylanady jáne memlekettik monopolıa men arnaıy quqyqty qospaǵanda, aıryqsha ári basym quqyqtardy berýge tyıym salynady», - dedi mınıstr.