Samat Ábishke qatysty qozǵalǵan eshqandaı qylmystyq is joq.
Ortalyq komýnıkasıalar qyzmetinde İshki ister mınıstri Marat Ahmetjanov jýrnalıser suraǵyna jaýap berdi, dep habarlaıdy Almaty-akshamy.kz Almaty.tv silteme jasap.
Olar mınıstrden Ulttyq qaýipsizdik qyzmetinde jumys istegen burynǵy prezıdenttiń týysy Samat Ábish pen İshki ister mınıstrliginiń burynǵy basshysy Erlan Turǵymbaevqa qatysty ister qashan qaralatyny jóninde surady.
«İshki ister organdarynda olarǵa qatysty eshqandaı sharalar tirkelmegen. Sondyqtan bizdiń óndiriste ne Turǵymbaevqa, ne Samat Ábishke qatysty qozǵalǵan eshqandaı qylmystyq is joq», - dep jaýap berdi Marat Ahmetjanov.
Sonymen qatar, mınıstr qańtar oqıǵasy kezindegi adamdardy azaptaǵan polıseıler jónindegi jýrnalıser suraǵyna jaýap bere almady. Marat Ahmetjanov boljam retinde nemese estigenin aıtyp, naqtylanbaǵan aqparatpen bólispeıtinin, bul ister onyń quzyretine jatpaıtynyn alǵa tartty.
«Bul bizdiń óndirisimizde emes. Ol polıseılerge qatysty qandaı shara qoldaný kerek, olar qamaqta ma, basqada ma, ony quzyrly organ sheshedi. Olardyń óndirisinde óz tergeýshisi bar, qadaǵalaıtyn prokýror bar. Azamattardyń prosesýaldyq quqyǵyn shekteıtin is-áreketter prokýratýra quziretinde. Sol úshin de eshqandaı boljam aıta almaımyn», - dedi ol.