Qazaqstanda 16 maýsymnan bastap áıelder quqyqtary men balalardyń qaýipsizdigin qamtamasyz etý týraly zań kúshine enedi, munda bala quqyqtary jónindegi óńirlik ýákilderdiń mártebesin zańnamalyq turǵydan bekitý kózdelgen.
Bul týraly Ortalyq komýnıkasıalar qyzmetinde ótken brıfıńte QR Oqý-aǵartý mınıstrligi Balalardyń quqyqtaryn qorǵaý komıteti tóraǵasynyń orynbasary aıtyp berdi, dep habarlaıdy Almaty-akshamy.kz.
2022 jyldan bastap elimizdiń 20 óńirinde óńirlik ýákilder jumys atqaryp keledi.
Iýlıa Ovechkınanyń aıtýynsha, óńirlik ýákilder QR Bala quqyqtary jónindegi ýákilimen tyǵyz baılanysta jumys isteıdi.
«Óńirlik ýákilder vedomstvoaralyq baılanysty úılestiredi, balalardyń quqyqtary buzylǵan árbir jaǵdaıdy jeke baqylaýynda ustaıdy jáne óz óńirindegi kámeletke tolmaǵandardyń isteri jáne olardyń quqyqtaryn qorǵaý jónindegi komısıalardyń quramyna kiredi. Bala quqyqtary jónindegi óńirlik ýákilder ınstıtýtyn engizý balalardyń quqyqtaryn qorǵaý júıesin nyǵaıtýdaǵy mańyzdy qadam bolyp tabylady. Bul balalardyń quqyqtarynyń buzylýyna barynsha tıimdi den qoıýǵa jáne olardyń aldyn alýǵa múmkindik beredi», - dep atap ótti Iýlıa Ovechkına.
Bala quqyqtary jónindegi ýákildiń quzyretine «111» baılanys ortalyǵynyń qyzmetin úılestirý, sondaı-aq memlekettik jáne qoǵamdyq ınstıtýttarmen ózara is-qımylyn uıymdastyrý kiredi.