Almaty. AQSHAMNEWS. KZ Almaty qalasynyń polısıasy esirtkige qarsy aılyqty bastady. Bul týraly Óńirlik komýnıkasıalar qyzmetiniń brıfıńinde Almaty qalasy PD esirtki qylmysyna qarsy is qımyl basqarmasynyń asa mańyzdy ister jónindegi aǵa jedel ýákili Dáýren Kóbeev málimdedi.
Onyń aıtýynsha, 2024 jyldyń 5 aıynda Almaty aýmaǵynda polısıa esirtki quraldarynyń zańsyz aınalymyna baılanysty 264 quqyq buzýshylyqty anyqtaǵan. Esirtki satýdyń 116 faktisiniń joly kesildi. 158 kılogramnan astam esirtki zattary tárkilendi jáne zańsyz aınalymǵa jiberilmedi.
«Búgingi tańda jahandyq problemalardyń biri sıntetıkalyq preparattar men olardy óndirýge arnalǵan zerthanalar bolyp otyr. Almaty polısıasy júrgizgen jedel jáne arnaıy is - sharalardyń nátıjesinde 5 esirtki laboratorıasy joıyldy», - dedi Dáýren Kóbeev.
Sonymen qatar, elektrondy tólemderdi qoldana otyryp, ınternet arqyly baılanyssyz ádis arqyly sıntetıkalyq esirtkini taratý úrdisi ózekti máselelerdiń biri bolyp qala beredi. Jyl basynan beri esirtki qylmysyna qarsy is-qımyl basqarmasynyń qyzmetkerleri 41 esirtki qoıyp ketýshini ustady.
Esirtkini taratatyn jáne jarnamalaıtyn 337 ınternet-resýrs anyqtaldy jáne buǵattaldy.
Jalpy jedel-izdestirý is-sharalarymen qatar, Almaty polısıasy nashaqorlyqtyń aldyn alý jáne esirtkige qarsy qoǵamdyq ımýnıtetti qalyptastyrý boıynsha jumys júrgizýde.
Jyl basynan beri megapolıste tártip saqshylary esirtkige qarsy 242 profılaktıkalyq is-shara ótkizdi.
«Narkostop» qozǵalysynyń eriktilerimen birlesip, esirtkiniń taralýy týraly aqparatty qamtıtyn 3 myń 651 graffıtı sýreti tabylyp, ústin boıap tastaý arqyly joıyldy.
Ol Almaty polısıasy nashaqorlyqqa jáne esirtkiniń zańsyz aınalymyna qarsy halyqaralyq kúres kúni aıasynda esirtkige qarsy aılyqty bastaǵanyn atap ótti.
Polıseıler men narkolog-dárigerler aldyn alý sharalarynyń tıimdiligin arttyrý maqsatynda temeki ónimderin, alkogóldik ishimdikterdi tutynýdyń zıandylyǵy jáne olardyń saldary týraly dárister, semınarlar, trenıńter sıklin ótkizedi.Atalǵan aılyqtyń uranymen Almaty polısıasy 10 jastan asqan aýdıtorıaǵa arnalǵan áleýmettik rolıkti tanystyrady. Ol aıtylýy tıis negizgi oıdyń jasóspirimderge qol jetimdi bolýy úshin tanymal «Minecraft» balalar oıynynyń formatynda jasalǵan.
Memleket basshysy men Úkimet esirtkige qarsy naqty jáne dáıekti strategıa júrgizýde, onyń sheńberinde nashaqorlyqtyń aldyn alýǵa, eskertý jasaýǵa jáne jolyn kesýge baǵyttalǵan birqatar jobalar iske qosyldy.
«Bizdiń ortaq maqsatymyz - esirtkisiz bolashaqty qurý. Búginde biz esirtkige qarsy kúresti memlekettik organdar ǵana emes, taqyryptyq is – sharalarǵa Qoǵamdyq qozǵalystar men azamattyq qoǵamdastyqtyń qatysýy men qoldaýy-bizdiń birlesken kúresimiz de bar ekenin kórip otyrmyz. Ortaq kúsh – jigermen biz jastarymyzdy ólimge ákeletin táýeldilikten saqtandyryp, qorǵaı alatynymyzǵa senimdimin», - dep qorytyndylady Dáýren Kóbeev.