Qazaqstanda áýe kompanıalarynyń óz reısteriniń jaǵdaıyn ózgertýi nemese olardy oryndamaýy saldarynan jolaýshylarǵa keltirilgen yńǵaısyzdyqtar úshin jaýapkershiligi kúsheıtiledi. «Ashyq NQA» portalynda jarıalanǵan zań jobasynda áýe kompanıalarynyń jolaýshylarǵa kórsetiletin qyzmetterdi tıisti deńgeıde oryndamaýy, reıstiń keshigýi, joıýy nemese marshrýtynyń ózgerýi sıaqty jaǵdaılar úshin aıtarlyqtaı aıyppuldar qarastyrylǵan, dep habarlaıdy aqshamnews.kz
Qazaqstan Respýblıkasynyń áýe keńistigin paıdalaný týraly zańy jáne QR Ákimshilik quqyq buzýshylyq týraly kodeksiniń 567-baby boıynsha áýe kompanıalary reısterdiń keshigýi nemese joıýy úshin jolaýshylarǵa ótemaqy tóleýge mindetti. Biraq bul talaptar reıs marshrýtynyń nemese ushý ýaqyttarynyń ózgerýine qatysty jaǵdaılarda qoldanyla bermeıdi. Quqyqtyq olqylyqtar saldarynan, áýe kompanıalary kóbine bul ózgerister úshin jaýapkershilikten jaltarady. Al mundaı jaǵdaılar jıi kezdesip, 2023 jyly reısterdiń 16 myńnan astam keshigýi tirkelgen jáne jolaýshylardyń shaǵymdary ótken jylmen salystyrǵanda eki ese kóbeıgen.
Qujattyń jańa redaksıasynda áýe kompanıalarynyń jaýapkershiligin arttyrý maqsatynda, reıs ózgeristeri nemese basqa da kemshilikter úshin aıyppul mólsheri aıtarlyqtaı ósedi. Jańa túzetýlerge sáıkes:
- Birinshi ret buzýshylyq úshin aıyppul mólsheri 400 aılyq eseptik kórsetkishke (AEK) deıin,
- Bir jyl ishinde qaıtalanǵan jaǵdaıda 2000 AEK-ke deıin aıyppul salynýy múmkin.
Bul sharalar áýe kompanıalaryn óz mindettemelerin oryndaýǵa, ıaǵnı jolaýshylarǵa jaqsy qyzmet kórsetýge yntalandyrýdy maqsat etedi.
Álemniń kóptegen elderinde jolaýshylardyń yńǵaısyzdyqtary úshin ótemaqy tóleý mindeti zańdy túrde qarastyrylǵan. Mysaly, AQSH-ta jolaýshylardyń quqyqtaryn buzǵany úshin aıyppuldar 50 myń AQSH dollaryna deıin jetýi múmkin, al Saýd Arabıasynda bul soma 50 myń rıalǵa deıin jetedi.
Jańa zań jobasynda áýe kompanıalarynyń normalardy saqtaýyn baqylaý jolaýshylardyń shaǵymdary men ınspeksıalyq tekserýler arqyly júzege asyrylady. Eger áýe kompanıasy óz mindettemelerin oryndaýdan bas tartsa, másele sotqa deıin jetkizilýi múmkin. Bul zań jobasy qosymsha tekserýler júrgizýdi qarastyrmasa da, aıyppuldardy kóbeıtý arqyly avıakompanıalardyń jaýapkershiligin arttyrýdy kózdeıdi.