Qazaqstanda aýdandyq, qalalyq jáne aýyldyq okrýgterdiń derbestigi artady
Senat aýdandyq, qalalyq jáne aýyldyq okrýgterdiń derbestigi men jaýapkershiligin keńeıtý jónindegi zań jobasyn maquldady, dep habarlady Almaty-akshamy.kz QR Senat baspasóz qyzmetiniń habaryna silteme jasap.
Búgin QR Parlamenti Senatynyń plenarlyq otyrysy barysynda depýtattary «QR keıbir zańnamalyq aktilerine bıliktiń aýdandyq, qalalyq jáne aýyldyq deńgeıleriniń derbestigi men jaýapkershiligin keńeıtý máseleleri boıynsha ózgerister men tolyqtyrýlar engizý týraly» zań jobasyn maquldady.
Ulttyq ekonomıka mınıstri Áset Erǵalıevtiń aıtýynsha, zań jobasy birqatar normatıvtik quqyqtyq aktilerge aýdandyq mańyzy bar qalalardyń, aýyldardyń, kentter men aýyldyq okrýgterdiń kiris bazasyn keńeıtý; búdjettik rásimderdi ońaılatý; ákimshilik-aýmaqtyq birlikterge qoıylatyn talaptardy jetildirý; derbestikti keńeıtý jáne jergilikti ókildi jáne atqarýshy organdardyń jaýapkershiligin kúsheıtýge qatysty ózgerister men tolyqtyrýlar engizýdi kózdeıdi.
Búdjettiń kiris kózderin ulǵaıtý úshin JÓB búdjettiń IV deńgeıine salyqtar men tólemderdiń qosymsha tórt túri beriledi. Budan basqa, búdjettik rásimder jeńildetiledi. Atap aıtqanda, aýyldyq okrýg ákimi apparaty úshin búdjetke jıyrma paıyzdan aspaıtyn kólemde túzetý engiziledi. Túzetý jergilikti qoǵamdastyq jınalysynyń kelisimi boıynsha júrgiziledi.
«Búdjet kodeksine qarjy jyly ishinde aýdan men aýyldyq okrýg búdjetteri arasyndaǵy JST kóleminiń ózgerýine jol bermeıtin naqtylaýshy norma engiziledi. Osylaısha, aýyldyq okrýgter ákimderinde sýbvensıalardy azaıtý nemese alyp qoıýlardy ulǵaıtý qaýpinsiz aýyldyq okrýgterdiń salyq salynatyn bazasyn ulǵaıtýǵa múddelilik bolady», - dedi Ácet Erǵalıev.
Sondaı-aq ákimshilik-aýmaqtyq birlikter sanatyn ózgertý tártibi de aıqyndalady. Qala mártebesiniń ózgerýi sáıkes kelmegen jaǵdaıda bes jyl ishinde, aýyldarda úsh jyl ishinde júzege asyrylady.
Zań jobasynda máslıhat pen olardyń depýtattarynyń mártebesin arttyrý boıynsha túzetýler, atap aıtqanda, máslıhat sesıasynyń tóraǵasy laýazymyn taratý jáne onyń ókilettigin máslıhat hatshysyna berý kózdelgen.
Zań jobasy Memleket basshysynyń «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» atty Qazaqstan halqyna Joldaýyn iske asyrý maqsatynda ázirlendi.
«Zań jobasy óńirlerdiń derbestigi men jaýapkershilik deńgeıin arttyrýǵa múmkindik berip, jergilikti mańyzy bar máselelerdi jedel sheshý úshin búdjettik rásimderdi aıtarlyqtaı jeńildetedi», - dedi Ulttyq ekonomıka mınıstri.
