Qazaqstanda óz kásibin júrgizýge múmkindik alady.
Qandastarymyzǵa 10 jyldyq jeńildetilgen vıza rásimdep, Qazaqstanda óz kásibin júrgizýge múmkindik beriledi. Bul týraly Eńbek jáne halyqty áleýmettik qorǵaý mınıstri Tamara Dúısenova Úkimet otyrysy barysynda aıtty, dep habarlaıdy Almaty-akshamy.kz QazAqparatqa silteme jasap.
Tamara Dúısenovanyń atap ótýinshe, «Ashyq Qazaqstan 500+» atty kóshi-qon saıasatynyń jańa tujyrymdamasynyń tórtinshi baǵyty etnıkalyq kóshi-qondy retteıdi.
«Bul baǵytta negizgi eki másele bar. Birinshisi – shetelde turatyn etnıkalyq qazaqtardyń áleýetin paıdalaný. Osy maqsatta «Ata joly» kartasyn engizý usynylady. Bul qujat joǵary deńgeıdegi kásibı maman nemese ózderi turatyn elderde tabysty bıznes-keısterdi iske asyrǵan jáne olardy Qazaqstanda júzege asyrýǵa yqylasty qazaqtarǵa beriletin bolady», - dedi ol.
Onyń atap ótýinshe, mundaı azamattar 10 jyldyq jeńildetilgen vıza rásimdep, Qazaqstanda óz kásibin júrgizýge múmkindik alady.
«Olardy tarıhı otanyn damytýǵa qosqan úlesi úshin jyl saıynǵy «Paryz» baıqaýy aıasynda Prezıdent syılyǵymen marapattaýdy usynyp otyrmyz. Ekinshi – elge keletin qandastardyń kóshi-qonyn retteý tetikterin jetildirý. Iaǵnı, elimizdegi demografıalyq jáne ekonomıkalyq úrdisterdi eskere otyryp, qujattardy rásimdeýdiń alǵashqy kezeńinde qandastardy eńbek kúshi tapshy óńirlerge qonystanýǵa qosymsha yntalandyrý usynylady», - dedi Tamara Dúısenova.