Mamandar áskerılerdiń basynda bar máseleni aıtty.
Áskerdegi eń úlken másele qandaı? Bul suraqqa jaýapty Qorǵanys mınıstrligi BAQ-pen jumys basqarmasynyń bastyǵy Rýslan Jangýlın aıtty, dep habarlaıdy Almaty-akshamy.kz Baq.kz silteme jasap.
«Árıne, máseleler bar. Qazirgi tańda ońtaıly jolmen sheshilip jatyr. Eń basty máseleniń biri - baspana. Óıtkeni árbir áskerı alańsyz qyzmet etý úshin onyń baspanasy bolýy qajet. Azamat «qaı jerde turamyn, qaı jerde júremin» dep alańdamaýy tıis. Osyǵan deıin olardyń otbasy múshelerin tıisti turǵylyqty jerleri boıynsha jumyspen qamtý, balasyn balabaqshaǵa ornalastyrý máselesi týyndaıtyn edi. Ol bizdiń «Áskerı qyzmet jáne áskerlerdiń mártebesi týraly» zańǵa sáıkes, sheshilip jatyr. Ásirese, 2018 jyldan bastap atalǵan zańǵa ózgerister engizildi. Jalpy, baspana máselesi tolyqtaı sheshildi dep aıtýǵa tolyq negiz bar. Nege deseńiz, buryn áskerı qyzmetkerler kóbine páterdi jaldap keldi, sol úshin aqsha tólegen bolatyn. 2018 jyly bastap árbir áskerı qyzmetshiniń banktegi esepshotyna aqsha aýdarylady. Iaǵnı, árbir aımaqtyń óziniń arnaıy tólemaqysy bolady. Memleket áskerı qyzmetshilerdi jumyspen qamtyp, olardyń balalaryn kezekten tys balabaqshaǵa ornalastyrady», - dedi maman.
Sonymen qatar spıker áskerı qyzmetshilerdiń jalaqysy ósetinin aıtty.
«2021-2023 jyldar aralyǵynda áskerılerdiń jalaqylary 70 paıyzǵa deıin ulǵaıady», - dedi Rýslan Jangýlın.