Almaty qalasynda H «Ýran ónerkásibiniń ózekti máseleleri» halyqaralyq ǵylymı-praktıkalyq konferensıasy ótip jatyr.
Konferensıa jumysyna Qazaqstan, Reseı, Fransıa, Kanada, Germanıa, Ulybrıtanıa, Polsha, Ózbekstan, Qyrǵyzstan, Tájikstan jáne Japonıa ǵalymdary qatysýda. Jalpy alǵanda, is-sharaǵa atom salasyndaǵy jetekshi kásiporyndar men kompanıalardyń 450-den astam ókilderi keldi, dep habarlaıdy Almaty-akshamy.kz
Atap ótý kerek, atom energetıkasyn damytýǵa bet alǵan álemdik úrdis elimizde de osy salaǵa erekshe nazar aýdarýdy talap ete bastady. Bul rette, qatysýshylar ýrannyń mıneraldyq-shıkizat bazasyn damytýdyń strategıasyn, ǵylym men óndiristi jetildirý máselelerin jan-jaqty qarastyrýy zańdy.
Konferensıanyń negizgi maqsaty da sol – ýran óndirýdiń qazirgi jaǵdaıy men aldaǵy bolashaǵyn talqylaý, halyqaralyq qoǵamdastyqpen birlesip, ozyq ǵylymı-tehnologıalyq maqsattardy atap ótý jáne olardy sheshý úshin alań usyný.
Ýran ónerkásibiniń mańyzdy mindetterin sheshýdi ǵylym men tehnologıasyz, halyqaralyq arenada elestetý múmkin emes. Atom ındýstrıasyn damytý álemdik kompanıalardy, ǵalymdardy bilikti mamandardy biriktirýdi talap etedi.
Elimizdegi ulttyq kompanıa «Qazatomónerkásip» salanyń qoldanystaǵy mıneraldyq-shıkizattyq, tehnologıalyq, zıatkerlik jáne ekonomıkalyq áleýetin tıimdi paıdalaný ári ulǵaıtý boıynsha aýqymdy baǵdarlamany iske asyryp jatyr.
«Ózderińiz bilesizder, Qazatomónerkásip elimizdiń tek beıbit atomdy damytý saıasatyn ustanady. Konferensıada qamtylatyn máselelerdiń keń aýqymy men qatysýshylardyń joǵary deńgeıi oǵan Qazaqstan men basqa elder úshin strategıalyq mańyzdy sala retinde álemdik ýran ındýstrıasyndaǵy mańyzdy oqıǵa mártebesin beretini sózsiz», dep atap ótti Qazatomónerkásiptiń Basqarma tóraǵasy Erjan Muqanov.
Qazaqstannyń memlekettik saıasatyndaǵy mańyzdy baǵyttardyń biri – álemdik sahnada «beıbit atom» salasyn damytýǵa basymdyq berý. Ári atalǵan salada ǵylymdy damytý máselesine betburys jasaý ásirese mańyzdy ekendigi anyq.
Osyǵan baılanysty, Qazatomónerkásip basshysy «Atom ındýstrıasyndaǵy ǵylymı-tehnologıalyq kóshbasshylyqqa qol jetkizý maqsatynda óndiristik proseske ozyq tehnologıalar men ınovasıalyq sheshimderdi engize otyryp, ǵylymı ázirlemelerdi belsendi júrgizý mańyzdy», - dedi.
Konferensıa barysynda geologıa, geotehnologıa jáne taý-ken daıyndyq jumystary, ýran óndirý jáne qaıta óńdeý tehnologıasy, atom salasy kásiporyndarynyń qaýipsiz jumys isteýi jáne tehnogendik qaldyqtardy basqarý, turaqty damý (ESG) máseleleri, atom salasy jumys isteýiniń quqyqtyq, makroekonomıkalyq jáne bilim berý aspektileri, atom salasyndaǵy sıfrlandyrý, avtomattandyrý jáne robottandyrý talqylanýda.
Shara aıasynda Qazatomónerkásip Paul Scherrer Institute (Shveısarıa) pen Qazaqstan-Brıtan tehnıkalyq ýnıversıteti arasynda yntymaqtastyq kelisime qol qoıdy. Bul qujat salanyń ǵylymı-zertteý jumystaryn júrgizýge, atom salasyndaǵy ǵalymdardy qoldaý men jańa mamandardy daıyndaýǵa yqpal etýge baǵyttalǵan.