Ashylyp jatqan jumys oryndarynyń deni kásipkerlik salasynda.
Qazaqstandyqtardy eńbekpen qamtý baǵytynda birneshe memlekettik joba iske asyp jatyr. Tolyǵyraq QR Eńbek jáne halyqty áleýmettik qorǵaý vıse-mınıstri Oljas Ordabaev aıtyp berdi, dep habarlaıdy Almaty-akshamy.kz QazAqparatqa silteme jasap.
«Halyqty eńbekpen qamtý Memleket basshysynyń tapsyrmasyna sáıkes árbir 10 myń turǵynǵa 100 jańa jumys ornyn ashý jobasy, sonymen qatar memlekettik sýbsıdıa arqyly jáne bosaǵan jumys oryndaryn paıdalaný arqyly iske asyp jatyr. Bıyl 10 aıdyń qorytyndysy boıynsha 230 myńǵa jýyq adam ulttyq joba aıasynda eńbekpen qamtylǵan. Onyń ishinde 182,9 myńy - memleket sýbsıdıalaıtyn jumys oryndary. 181 myńǵa jýyq shaǵyn jáne orta bıznes salasynda 261 myńnan astam adam jumyspen qamtyldy», - dedi Oljas Ordabaev Ortalyq komýnıkasıalar qyzmeti alańynda ótken baspasóz máslıhatynda.
Sonymen qatar vıse-mınıstr keltirgen derekke sáıkes, 273,5 adam bosaǵan jumys oryndary esebinen eńbekpen qamtyldy.
«Ulttyq joba aıasynda ashylyp jatqan jańa jumys oryndarynyń deni kásipkerlik salasynda. Atap aıtqanda, 15 myńǵa jýyq jumys orny «Qýatty óńirler - el damýynyń draıveri» jobasy aıasynda agroónerkásiptik keshendi damytý boıynsha 10 myńnan astam, "Bilimdi ult" jobasy boıynsha 7,8 myń jumys orny, «Jasyl Qazaqstan» jobasy boıynsha 3,7 myń, ulttyq "Rýhanı jańǵyrý" jobasy aıasynda 3,3 myń, "Deni saý ult" jobasy aıasynda 790 adam eńbekpen qamtylyp otyr»,- deıdi ol.