31 qazan - áskerı baılanysshy kúni, dep habarlaıdy Almaty-akshamy.kz.
Elimizdiń Qarýly kúshterindegi ataýly kúnder men merekelerdiń ishinde áskerı baılanysshylar kúniniń orny erekshe.
Baılanys áskerleri jaýyngerlik daıyndyqty uıymdastyrýdy jáne Qarýly kúshterdiń kúndelikti qyzmetin qamtamasyz etedi.
Baılanys áskerleriniń tehnıkalyq jaǵynan jabdyqtalýy únemi artyp keledi. Avtomattandyrý, baılanys quraldarynyń sońǵy júıeleri jáne ozyq tehnologıalyq ázirlemeler kez kelgen jaǵdaıda baılanysty qamtamasyz etýdegi eń kúrdeli tapsyrmalardy tıimdi sheshýge múmkindik beredi.
Qazirgi zamanǵy tehnıkalar saýatty basqarýdy, ıaǵnı muqıat tehnıkalyq daıyndyq pen avtomatızmge ulasqan daǵdylardy qajet etedi. Áskerı ortada "Baılanyssyz basqarý múmkin emes" dep aıtylýy zańdylyqqa aınalǵan.
Shtabtar men bólimsheler arasyndaǵy aqparat almasýdyń jyldamdyǵy men sapasy, qurlyqtaǵy, avıasıalyq jáne teńiz bólimsheleri is-qımyldarynyń úılesimdiligi, sondaı-aq jaýyngerlik quraldar men qarýdy tıimdi qoldaný turaqty baılanysqa qatysty.
Áskerı baılanysshylar ózderiniń joǵary kásibıligi men sheberligin "Batyl toıtarys-2023", "Aıbalta-2023" strategıalyq oqý-jattyǵýlary men basqa da is-sharalar barysynda birneshe ret dáleldegen.
Qazaqstanda baılanys ofıserlerin Almatydaǵy Radıoelektronıka jáne baılanys áskerı-ınjenerlik ınstıtýtynda daıyndaıdy. Orta býyn mamandary Saǵadat Nurmaǵambetov atyndaǵy astanalyq áskerı kolejde bilim alyp shyǵady. Kishi deńgeıdegi áskerı-eseptik mamandyqtardyń negizin merzimdi qyzmet sarbazdary Almaty oblysyndaǵy baılanys áskerleriniń oqý ortalyǵynda ıgeredi.
Áskerı ǵylymdy damytýdyń mańyzdy qadamy Ulttyq qorǵanys ýnıversıtetiniń bazasynda Baılanys jáne aqparattyq qaýipsizdik kafedrasyn qurý boldy. Bul jerde keleshekte baılanys salasyndaǵy magıstranttar men doktoranttar daıarlanatyn bolady. Áskerı baılanys joǵary bilikti, óz isi men týǵan Otanyna berilgen baılanys áskerleriniń mamandarynan turady. Sol sebepti olarǵa áskerdiń jaýyngerlik daıyndyq júıesinde zor jaýapkershilik júktelgen.