Almatyda kúzgi otyrǵyzý kóshettiń ımýnıtetin jaqsartady – sarapshy
Kúz basynda aǵash otyrǵyzý kóshetterdi stresske ushyraýdan senimdi qorǵaıdy, dedi Qazaqstannyń kógaldandyrýshylar qaýymdastyǵy (AOK) Keńesiniń hatshysy, Almaty Garden Show bas dızaıneri Bıbigúl Dathabaeva. Sarapshy kúzgi ýaqytta aǵash otyrǵyzý eń qolaıly kezeń ekenin aıtty. Qazirgi klımattyq jaǵdaıda kógaldandyrýshylardyń ósimdikterdi otyrǵyzý úshin 2-3 aptasy ǵana bar, dep habarlaıdy almaty-akshamy.kz
«Qystan keıin ystyq jaz birden bastalady, ósimdikter birden ósip,, gúldene bastaıdy. Osy ýaqytta qaıta otyrǵyzý úlken stress. Eger siz belgilengen qysqa merzimde aıaqtamasańyz, onda kóp aǵashtyń óspeı qalý qaýpi bar, ásirese bul qalada kóshetterdi jappaı otyrǵyzý kezinde. Kúzde stress áldeqaıda az, barlyq agrotehnıkalyq norma men ereje saqtalǵan jaǵdaıda ósimdik qazir jaqsy tamyrlanyp, kóktemde kókteıdi», - dedi Bıbigúl Dathabaeva.
Landshaft dızaıneri kóptegen aǵash túrleri kúzgi otyrǵyzýǵa jaramdy ekenin atap ótti. Kógaldandyrýshylar Almatynyń klımattyq jaǵdaıyna yńǵaıly kóshetterdi ekken.
«Qazir kógaldandyrýshylar qaraǵash, emen, úıeńki, shaǵan, terek, katalpa, qaıyń, akasıa, shyrsha jáne jemis (alma, shıe, almurt, órik) otyrǵyzyp jatyr. Bular qalalyq jaǵdaıǵa, qysta tózimdi, kúı talǵamaıdy. Olar ońtústik astanany kógaldandyrýda burynnan qoldanylyp keledi, shahardyń tarıhı jasyl jelegin qalyptastyrǵan. Sondyqtan, menińshe, jańa kóshetter jasyl qordy tolyqtyrýmen qatar, qalanyń qalyptasqan kógaldandyrý stılin ózgertpeı, úılesimdi etedi», - dedi Bıbigúl Dathabaeva.
Sarapshy kógaldandyrý jumystary qalanyń úlkeıýine qaraı júrgizilýi kerek deıdi. Almaty qarqyndy damyp keledi, baq qala mártebesin saqtaý úshin jasyl qordy saqtap, únemi tolyqtyryp otyrý mańyzdy.
Aıta keteıik, bıyl Almatyda 320 myń aǵash otyrǵyzý josparlanǵan, onyń 20 myńy kóktemde, 300 myńy kúzde egiledi.