Uıymdarda kórsetiletin arnaýly áleýmettik qyzmetterdiń sapasyn arttyrý maqsatynda 2025 jylǵy 1 qańtardan bastap Qazaqstanda AÁQ kórsetetin mamandardyń tizilimi engizildi.
Tizilim – bul Áleýmettik qyzmetter portalynda tirkelgen mamandardyń elektrondyq tizimi, onda áleýmettik qyzmetker týraly tolyq aqparat bar: jeke derekteri, bilimi, biliktilikti arttyrý týraly málimetteri, atestattaýdan ótý týraly málimetteri, jumys tájirıbesi jáne t. b, dep habarlaıdy aqshamnews.kz.
Tizilim arnaýly áleýmettik qyzmetter kórsetetin barlyq mamandardyń tizbesin tıimdi qalyptastyrýǵa, áleýmettik qyzmetkerler týraly aqparatqa qoljetimdilikti jaqsartýǵa jáne kórsetiletin qyzmetterdiń sapasyn arttyrýǵa múmkindik beredi.
Qazaqstanda 2024 jyldyń qorytyndysy boıynsha 1023 obekti bólimshelerin eskere otyryp, barlyǵy 502 memlekettik uıym jáne 122 ÚEU arnaýly áleýmettik qyzmet kórsetedi. Olardyń ishinde arnaýly áleýmettik qyzmet kórsetý ortalyqtary, kúndizgi bolý ortalyqtary, ońaltý ortalyqtary men úıde áleýmettik kómek kórsetý bólimsheleri, ýaqytsha bolý ortalyqtary jáne daǵdarys ortalyqtary bar.
Áleýmettik qyzmetkerler búginde 8 qyzmet túrin kórsetedi, olar: áleýmettik-turmystyq, áleýmettik-psıhologıalyq, áleýmettik-pedagogıkalyq, áleýmettik-quqyqtyq, áleýmettik-ekonomıkalyq, áleýmettik-mádenı, áleýmettik-eńbek jáne áleýmettik-medısınalyq qyzmet.
AÁQ ońaltýdyń jeke baǵdarlamasyna sáıkes, olardyń alýshylarynyń jasyn jáne densaýlyq jaǵdaıyn, sondaı-aq turý jaǵdaılaryn eskere otyryp taǵaıyndalady.