Júrimbek Sydyqov – ǵalym, gıdrogeohımıa ǵylymynyń negizin qalaýshy.
Almatyda kórnekti gıdrogeolog-ǵalym, gıdrogeohımıalyq ǵylymnyń negizin qalaýshy, Uly Otan soǵysynyń ardageri, Qazaqstan Respýblıkasynyń eńbek sińirgen ǵylym qaıratkeri, geologıa-mıneralogıa ǵylymdarynyń doktory, Qazaqstan Respýblıkasy Memlekettik syılyǵynyń laýreaty, QR UǴA akademıgi Júrimbek Sydyqovtyń qurmetine memorıaldy taqta saltanatty túrde ashyldy, dep habarlaıdy Almaty-akshamy.kz
Almaty qalasy mádenıet basqarmasy basshysynyń orynbasary Danıar Álıev óziniń sózinde Júrimbek Sydyqovtyń Qanysh Sátbaev, Ýfa Ahmedsafın, Nataı Kenesarın syndy tanymal ǵalymdardyń izbasary bolǵanyn atap ótti.
Memorıaldy taqta Q.I. Sátbaev atyndaǵy Qazaq ulttyq tehnıkalyq zertteý ýnıversıteti janyndaǵy Ýálıhanov kóshesi, 94 mekenjaıda ornalasqan Ý.M. Ahmedsafın atyndaǵy Gıdrogeologıa jáne geoekologıa ınstıtýtynyń qabyrǵasyna ornatyldy. Munda Júrimbek Sydyqov 70 jylǵa jýyq jumys istegen bolatyn.
«Ol naǵyz zıaly edi, tereń ǵylymı bilimi, izgi nıeti men adamgershilik qasıetteri úshin áriptesteri men zamandastarynyń úlken qurmetine ıe boldy. Onyń eńbekteri ǵylymı qaýymdastyq pen memleket tarapynan joǵary baǵalanyp, marapattaldy. Júrimbek Sydyqovtyń ónegeli ómiri men jarqyn beınesi halqymyzdyń jadynda máńgi saqtalady. Almatylyqtardyń atynan barsha zıaly qaýymdy, stýdentterdi, ǵalymnyń izbasarlary men týystaryn memorıaldy taqtanyń ashylýymen shyn júrekten quttyqtaımyn», – dedi D.Álıev.
Kórnekti ǵalymdy eske alýǵa áriptesteri, týystary men jaqyndary, qoǵam qaıratkerleri, ǵylym men zıaly qaýym ókilderi, olardyń ishinde QR Parlamenti Senatynyń múshesi Baqytjan Jumaǵulov, QR Ulttyq Ǵylym akademıasynyń prezıdenti Murat Jurynov, Q. I. Sátbaev atyndaǵy Qazaq ulttyq tehnıkalyq zertteý ýnıversıtetiniń rektory Meıram Begentaev jáne taǵy basqalary keldi.
Aıta keterligi, Júrimbek Sydyqov 1940 jyly qazaq orta mektebin úzdik bitirip, Uly Otan soǵysynyń bastalýyna baılanysty áskerge shaqyrylǵan. 1944 jyly úshinshi aýyr jaraqattan keıin áskerden oralyp, Qazaq taý-ken metalýrgıa ınstıtýtynyń geologıalyq barlaý fakúltetine oqýǵa túsedi.
1965 jyly ol doktorlyq dısertasıa retinde sátti qorǵaǵan Oral-Muǵaljar taýlary men Muǵaljar jazyǵynyń jer asty sýlaryn uzaq jyldar boıy zertteý nátıjeleri boıynsha irgeli monografıa jazdy. 35 monografıa, gıdrogeologıalyq ǵylymnyń túrli baǵyttary boıynsha 720 jumysty jarıalady.
Gıdrogeologıa jáne geoekologıa ınstıtýtynda Júrimbek Sydyqov jasaǵan 124 esep jáne kartalar bar. Onyń jetekshiligimen 11 doktorlyq jáne 25 kandıdattyq dısertasıa qorǵaldy.
Uly Otan soǵysy jyldaryndaǵy áskerı erligi úshin, sondaı-aq jemisti ǵylymı qyzmeti men ǵylymı kadrlardy daıarlaǵany úshin birinshi dárejeli Otan soǵysy ordenimen, Halyqtar Dostyǵy ordenimen jáne Qazaqstan Respýblıkasynyń 20-dan astam medaldarymen jáne basqa da qurmetti nagradalarmen marapattalǵan.
Ǵylym men tehnıka salasy boıynsha Qazaq KSR Memlekettik syılyǵyna, «Qazaq KSR eńbek sińirgen ǵylym qaıratkeri» qurmetti ataǵyna, akademık Q.I. Sátbaev atyndaǵy syılyqqa, Qazaqstan Respýblıkasy Ulttyq Ǵylym akademıasynyń úlken altyn medaline ıe bolǵan.