«Qazgıdromet» Qazaqstanda bolatyn aptap ystyq týraly habarlamany joqqa shyǵardy
WhatsApp messendjerinde taraǵan habarlamada qazaqstandyqtar jazda aptap ystyq bolady dep dabyl qaǵýda. Aýa temperatýrasy Selsıı boıynsha 50 gradýsqa deıin kóteriledi. Ǵalymdardyń aıtýynsha, mundaı qubylys 60 jylda bir ret bolady eken. Bul jalǵan, - dep habarlaıdy almaty-akshamy.kz stopfake.kz-ke silteme jasap.
Aýa temperatýrasy rekord kórsetkishke deıin kóteriletini týraly feık burynnan bar. "Qazgıdromet" RMK bıyl taraǵan aqparatqa qatysty pikir bildirdi.
"Maýsymdyq boljam qysqa merzimdi boljamdarmen naqtylanyp otyrady. "Qazgıdromet" bir táýlikke, 3 kúnge jáne bir aptaǵa boljam jasaıdy. Aılyq boljamdardyń tek 70 paıyzy oryndalady. Qazaqstanda qýań dala aımaqtar bar. Túrkistan oblysy. Bul óńirde jazda aýa temperatýrasy 40 gradýsqa deıin kóterilýi - qalypty jaǵdaı. Álemniń birde-bir elinde sınoptıkter tutas bir maýsymǵa boljam jasamaıdy. Olar joramaldap aıtady. Damyǵan elderde boljam bir kúnge, 3 kúnge jáne bir aptaǵa jasalady. Esesine, aptalyq boljamdar da naqtylanady. Boljam uzaq merzimge jasalsa, ol naqty jaǵdaıǵa sáıkes bolmaıdy. Internette jarıalanǵan aqparatqa emes, tek resmı derekkózderge senińiz. Aldaǵy jazǵa arnalǵan konsýltatıvtik boljammen bizdiń resmı portalymyzda tanysa alasyzdar", - dedi "Qazgıdromet" RMK baspasóz qyzmeti.