MÁSQ-ǵa áleýmettik aýdarymdar túsken ortasha aılyq tabystyń 40%-yn quraıdy.
Jyl basynan beri Qazaqstan Úkimeti ana men balany qoldaý maqsatynda 77 mlrd teńge tólegen, dep habarlaıdy Almaty-akshamy.kz.
«2022 jyldyń birinshi toqsanynyń qorytyndysy boıynsha, Memlekettik áleýmettik saqtandyrý qorynan 59,2 myń áıel júktilikke jáne bosanýǵa, jańa týǵan balany (balalardy) asyrap alýǵa baılanysty tabysynan aıyrylǵan jaǵdaıda jalpy somasy 33,9 mlrd teńgege áleýmettik tólem aldy. Bir jasqa deıingi bala kútimine baılanysty tabysynan aıyrylýyna baılanysty 42,6 mlrd teńge somasynda 423,5 myń adam áleýmettik tólem aldy», - delingen Eńbekmıni baspasóz qyzmetiniń habarlamasynda.
Joǵaryda kórsetilgen tólemderdiń birinshisin alý quqyǵy júktilik jáne bosaný boıynsha ýaqytsha eńbekke jaramsyzdyq paraǵynda kórsetilgen kúnnen bastap týyndaıdy.
Júktilikke jáne bosanýǵa baılanysty tabysynan aıyrylǵan jaǵdaıdaǵy áleýmettik tólemniń mólsheri sońǵy jyldaǵy jumys isteıtin áıel úshin MÁSQ-ǵa kelip túsken áleýmettik aýdarymdar men eńbekke qabyletsizdik kúnderiniń sanyna baılanysty bolady.
Ekinshi tólemdi alýdyń negizgi sharttary – kiristi joǵaltý jáne bala 1 jasqa tolǵanǵa deıin naqty kútim jasaý. Tólem mólsheri balanyń týǵan kúnine deıingi sońǵy 2 jyl ishinde MÁSQ-ǵa áleýmettik aýdarymdar túsken ortasha aılyq tabystyń 40%-yn quraıdy.
Bul rette osy tólemniń eń tómengi mólsheri jumys istemeıtin áıelderge taǵaıyndalatyn 1 jasqa deıingi bala kútimi jónindegi osyǵan uqsas aı saıynǵy memlekettik járdemaqynyń mólsherinen kem bolmaýǵa tıis.
Eń joǵary mólsher eń tómengi jalaqynyń jeti eselengen mólsheriniń 40%-ynan aspaýy tıis.
Áleýmettik tólemderden 10% mindetti zeınetaqy jarnalary ustalynyp, áleýmettik tólem alýshynyń Biryńǵaı jınaqtaýshy zeınetaqy qoryndaǵy shotyna aýdarylady.
MÁSQ-dan tólenetin áleýmettik tólemder týraly tolyq aqparatpen https://gfss.kz/ ınternet-resýrsynda tanysýǵa bolady.