Ádilet mınıstrligi osyndaı bastama kóterip otyr.
Vedomstvo alıment tóleıtin ákelerdiń beretin tıyn-tebeni balany baǵyp, ósirýge jetpeıdi degen baılamǵa keldi, dep habarlaıdy Almaty-akshamy.kz
Ulttyq statısıka búrosynyń málimetinshe, Qazaqstanda ajyrasýlar sany jyl saıyn ósip barady. Mysaly, 2000 jyly 27 391 neke buzylsa, 2005 jyly bul kórsetkish 32 377-ge, 2010 jyly 41 617-ge, 2015 jyly 53 293-ke, 2019 jyly – 59 796-ǵa jetken. Pandemıa kezinde ajyrasý sany birshama azaıǵan: 2020 jyly 48 002-ni, al byltyrǵy 2021 jyly 48 239-dy qurady.
Sonymen qatar, Ádilet mınıstrligi ajyrasqan jubaılar arasynda alıment daýy jıi órshıtinin aıtyp dabyl qaǵýda. Bul da daǵdarystyń bir kórinisi bolsa kerek. Sondyqtan vedomstvo «Májbúrlep oryndatý týraly» jańa zań jobasy aıasynda alımentterdiń qoldanystaǵy mólsherin qaıta qarap, ósirýdi josparlap otyr.
«Qazaqstandaǵy alımentterdi óndirip alýdyń qoldanystaǵy júıesine sáıkes, boryshker óz tabysynyń nemese jalaqysynyń bir bóligin tóleıdi. Atap aıtqanda, 1 balasy bolsa, oǵan tabysynyń 4-ten 1 bóligin, 2 balaǵa – úshten bir bóligin, 3 jáne odan kóp balaǵa tabysynyń, jalaqysynyń jartysyn berýge tıis. Biraq bul júıe balanyń qajettilikterin tolyq kólemde qamtamasyz etpeıdi. Onyń ústine, alıment mólsheri ony tóleýshiniń jalaqysynyń belgili bir bóligine baılanysty bolǵandyqtan, bul oǵan aqshany tıisti kólemde berýden jaltarý úshin tólemderdi jasandy túrde tómendetýine múmkindik beredi. Mysaly, jalaqysy týraly qujattardy burmalaıdy, jumys berýshimen kelisip, tabysy-jalaqysynyń kólemine qatysty jalǵan kelisimsharttar jasasady», - dep túsindirdi Ádilet mınıstrligi.