«Qazaqstannyń eńbek sińirgen dárigeri» qurmetti ataǵy belgilenbek.
Bul týraly QR Densaýlyq saqtaý mınıstri Ajar Ǵınıat aıtty, dep habarlaıdy Almaty-akshamy.kz
«Medısına qyzmetkerleriniń kásibı jaýapkershiligin saqtandyrý júıesin engizýdi qamtamasyz etý maqsatynda «Keıbir zańnamalyq aktilerge densaýlyq saqtaý máseleleri boıynsha ózgerister men tolyqtyrýlar engizý týraly» zań jobasy ázirlendi. Osy aıda ol QR Parlamentiniń Májilisine engiziletin bolady», - dedi mınıstr Ortalyq komýnıkasıalar qyzmetinde ótken baspasóz máslıhatynda.
Onyń aıtýynsha, zań jobasynda Qylmystyq kodekstiń 317-babynyń qylmystyq normalaryn izgilendirý kózdelgen. Iaǵnı, aıyppul sanksıalary jeńildetiledi. Sottyń qaraýyna bas bostandyǵyn shekteý boıynsha balama engiziledi. Bas bostandyǵynan aıyrý merzimderi qysqartylady.
«Jáne de osy zań jobasy boıynsha medısınalyq kómektiń sapasyn arttyrý maqsatynda pasıenttiń ómiri men densaýlyǵyna zıan keltirgeni úshin kásiptik jaýapkershilikti arttyrý, olardy saqtandyrý kózdeledi. Sonymen qatar bilimdi, eńbek sińirgen dárigerlerge «Qazaqstannyń eńbek sińirgen dárigeri» qurmetti ataǵyn belgileý qarastyrylǵan», - dedi Ajar Ǵınıat.