Qazaqstanda áli kúnge deıin koronavırýstyń baryna senbeıtin azamattar bar. Sondaı-aq, olar vaksınaǵa da senbeıdi eken. Bul týraly QR Densaýlyq saqtaý mınıstrligi sanıtarlyq-epıdemıologıalyq baqylaý komıtetiniń resmı ókili Erjan Baıtanaev málim etti, dep habarlaıdy Almaty-akshamy.kz QazAqparatqa silteme jasap.
«Vırýsty jeńýdiń jalǵyz joly vaksına ekenin adamdarǵa tolyqtaı jetkizý múmkin bolmaı otyr. Keıbir adamdar medısınanyń qudyretin janyna dert batqanda nemese jaqynynan aırylǵan kezde ǵana túsinip jatady. Ókinishke qaraı, áli kúnge deıin koronavırýsqa senbeıtin qazaqstandyqtar bar. Vırýspen 3-shi jyl kúresip kelemiz. Senbegenimen qoımaı, COVID-19-dy sizder oılap taptyńyzdar ǵoı dep suraıtyn jandar bar. Bul jerde feık aqparattardyń taralýy keri áserin tıgizip jatyr. Jalǵan aqparattarǵa qatysty kúnine birneshe túsinik berip, resmı aqparata súıený kerektigi týraly aıtyp jatyrmyz. Degenmen kelesi kúni basqa bir feık shyǵyp jatady», - dedi Erjan Baıtanaev "Habar" telearnasyna bergen suhbaty barysynda.
Onyń aıtýynsha, qazir álemde vaksınaǵa suranys joǵary jáne ony elge jetkizý memlekettik deńgeıdegi kelissóz ben birneshe ret kezdesýdiń nátıjesinde júzege asyp jatyr.
«Sondyqtan múmkindikti paıdalanyp, tegin vaksınany alý kerek. Onyń ústine bizdiń vaksınanyń birneshe túri bar. Iaǵnı adamdarda tańdaý bar. Qazaqstanǵa syrttan ákelinetin ár vaksına zerthanalyq tekseris pen baqylaýdan ótedi. Sodan soń ekpeni el aýmaǵynda resmı tirkeýden ótkizedi. Vaksınaǵa qatysty taǵy bir mańyzdy jaıt - Qazaqstanda vaksına alyp, qaıtys boldy degen jaǵdaı tirkelgen emes», - deıdi ol.