Premer-Mınıstr Álıhan Smaıylov kadrlar tapshy óńirlerge ustazdardy tartý úshin qosymsha aqy tóleý sharasyn qarastyrý keregin aıtty, dep habarlaıdy Almaty-akshamy.kz
Memleket basshysy joǵary, ásirese, tehnıkalyq joǵary bilimdi damytýǵa erekshe nazar aýdarýdy tapsyrdy. Indýstrıalandyrý men sıfrlandyrý jaǵdaıynda birinshi kezekte zamanaýı tásilder men daǵdylardy meńgergen saýatty tehnıkalyq mamandar qajet. Joǵary bilim berý júıesin qaıta qaraý otandyq ýnıversıtetterdiń básekege qabilettiligin arttyrý, joǵary bilimdi urpaqtyń jańa býynyn tárbıeleý úshin qajet. Bul baǵyttaǵy jumysty jedeldetip, tanymal ýnıversıtetterdiń fılıaldaryn, kampýstaryn ashý isinde naqty sharalar qabyldaý kerek, - dep aıtty ol.
Aıtýynsha, jastardyń joǵary bilim alý múmkindigin keńeıtý úshin memlekettik tapsyrys kólemin ulǵaıtý, onyń ishinde elimizdiń batys óńirleriniń stýdentteri úshin tehnıkalyq mamandyqtar boıynsha qosymsha 10 myń grant bólý josparlanyp otyr.
Jalpy, joǵary bilim salasynda granttar arqyly memlekettik tapsyrystardy bólý kezinde Bilim mınıstrligi men ákimdikter óńirlerdiń erekshelikteri men oblystardaǵy kadrlarǵa degen qajettilikti eskerýi tıis. Tehnıkalyq ǵylymdardy damytýǵa basymdyq berý, «E-lab» biryńǵaı platformasyn qurý, ǵylymdy bazalyq qarjylandyrýdy keńeıtý arqyly ǵylymı ınfraqurylymdy jańǵyrtý jónindegi sharalar keshenin qarastyrý qajet, - dedi Álıhan Smaıylov.
Osy rette Úkimet basshysy Bilim mınıstrligine birneshe tapsyrma berdi.
Birinshi. Prezıdent tapsyrmalaryna sáıkes, «Bilimdi ult» sapaly bilim berý» ulttyq jobasyn tez arada qaıta qaraý kerek.
Ekinshi. Ulttyq ekonomıka, Qarjy mınıstrlikterimen birlesip, Úkimettiń 2022 jylǵa arnalǵan is-qımyl baǵdarlamasynyń jobasyna Balalardy balabaqshaǵa kezekke qoıýdyń biryńǵaı sıfrlyq bazasyn qurý, Tárbıe jumysy tujyrymdamasyn qabyldaý, Qosymsha bilim berýdiń biryńǵaı ulttyq portalyn qurý jónindegi is-sharalardy engizýdi qamtamasyz etý qajet.
Úshinshi. Kásiporyndardyń kolejderdi qamqorlyqqa alýyn damytý jónindegi keshendi jospardyń jobasyn pysyqtap, osy jylǵy 10 aqpanǵa deıin engizsin.
Tórtinshi. Jetekshi sheteldik joǵary oqý oryndarynyń fılıaldaryn ashý jónindegi jol kartasyn osy jylǵy 7 aqpanǵa deıin engizý kerek.
Besinshi. Salalyq memlekettik organdarmen birlesip, tehnıkalyq baǵyttaǵy ǵylymı kadrlardy daıarlaýǵa basymdyq berý qajet, onyń ishinde jas ǵalymdarǵa granttar bólý jáne jyl saıyn jetekshi sheteldik ǵylymı ortalyqtarǵa jiberý jumystarynyń aıasynda da uıymdastyrý kerek.