Bıyl alǵash ret túrkitildes elder arasynda bolashaq jumysshy mamandardyń kásibı sheberligin arttyrýǵa baǵyttalǵan TurkicSkills kásibı sheberlik chempıonaty ótedi.
Bul týraly Qazaqstannyń Oqý-aǵartý mınıstrliginiń baspasóz qyzmeti málimdedi, dep habarlaıdy aqshamnews.kz.
Bul shara Memleket basshysy jarıalaǵan Jumysshy mamandyqtary jyly aıasynda ótetin negizgi is-sharalardyń birine aınalmaq. Bastama túrkitildes elderdiń jastary men stýdentteri arasynda kásibı sheberlikti damytý men ilgeriletýge, túrli salalardaǵy úzdik tájirıbelerdi anyqtaýǵa, ekonomıkasy ózara baılanysqan eldermen ınovasıalyq sheshimder boıynsha tájirıbe almasýǵa jáne olardy iske asyrý úshin platforma qurýǵa baǵyttalǵan.
Chempıonat Túrksoı uıymynyń 2025 jylǵy mádenı astanasy bolyp tańdalǵan Aqtaý qalasynda ótedi dep kútilýde.
Anyqtama úshin: WorldSkills qozǵalysy kásibı quzyrettilikter men daǵdylardy jetildirý úshin birlesip jumys isteıtin 89 eldi biriktiretin álemdegi jumysshy kásipteriniń bedelin arttyrýdyń negizgi quraldarynyń biri bolyp tabylady. Qazaqstan 2014 jyldan bastap WorldSkills International halyqaralyq qozǵalysynyń tolyqqandy múshesi bolyp tabylady. 10 jyl ishinde elimizde 30 quzyrettilik boıynsha 200-ge jýyq óńirlik jáne 8 respýblıkalyq chempıonat ótkizildi. Ótken jyly ulttyq qurama WorldSkills Lyon 2024 álem chempıonatynda el tarıhynda úzdik nátıjelerge qol jetkizip, «Ulttyń úzdigi» nomınasıasy boıynsha 6 medal men marapatqa ıe boldy.