Mınıstrlik «Adam saýdasyna qarsy kúres týraly» Zań jobasyn ázirleýde
Qazaqstanda 4 aıdyń ishinde adam saýdasynyń 30-ǵa jýyq faktisi tirkelip, 3 qylmystyq top anyqtaldy, dep habarlaıdy Almaty-akshamy.kz Almaty.tv-ge silteme jasap habarlaıdy.
İİM aqparyna saı, jyl saıyn elde osyndaı 100-den astam qylmys tirkeledi eken. Marat Ahmetjanov bizdiń memlekette adam saýdasymen kúresti retteıtin arnaıy Zań joq dep otyr.
Adam saýdasyna qarsy is-shara tek zardaptarmen kúresý bolyp tur. Bıyl 4 aıdyń ishinde bul jaıtqa qatysty 30-ǵa jýyq is tirkelip, 3 qylmystyq top ustalǵan. Al jyl saıyn elimizde osy sıaqty 100-den astam fakt tirkeledi eken. İshki ister mınıstri Marat Ahmetjanov resmı statısıkanyń barlyǵy «aısbergtiń ushy» ǵana ekenin moıyndap otyr. Al shyn máninde qansha adam atalǵan qylmystyń qurbany bolǵany belgisiz. Sondyqtan ol elde adam saýdasyna qatysty arnaıy Zań bekitý keregin atap ótti.
«Ashyǵyn aıtqanda, kóp jyl boıy eshkim bul máselemen keshendi aınalysqan joq. Mundaı qylmystarǵa yqpal etetin shynaıy sebepter men jaǵdaılarǵa taldaý júrgizilgen joq. Qazir bizde adam saýdasynyń qurbany týraly tolyq málimet joq. Nelikten olar qurbanǵa aınalady? Olar tuzaqqa qalaı túsedi? Odan ne sebepti shyǵa almaıdy? Óz quqyqtaryn nege bilmeıdi, polısıaǵa nege barmaıdy?», – dedi QR İİM Marat Ahmetjanov.
BUU málimetine sáıkes, álemdegi adam saýdasy qurbandarynyń 70 paıyzy – áıelder men jas qyzdar. Al árbir úshinshisi – balalar. Mınıstrdiń sózinshe, bul salanyń jasyryn bolýy jaǵdaıdy qıyndata túsedi. Endi mınıstrlik «Adam saýdasyna qarsy kúres týraly» Zań jobasyn ázirlep jatyr eken. Joba boıynsha, Eńbek mınıstrligi adam saýdasymen kúreske jaýapty ýákiletti organ bolady.
«Zań deńgeıinde alǵash ret İİM men Eńbek mınıstrligi adam saýdasymen kúresetin ýákiletti organ bolyp aıqyndalmaqshy. Sonyń negizinde ýákiletti organdardyń fýnksıalary naqty bekitiledi. Qalǵan 12 memlekettik organ men ákimdikterdiń, úkimettik emes uıymdardyń fýnksıasy da naqtylanady. «Adam saýdasyna qarsy kúres týraly» Zań kelesi jyly kóktemde Májiliske usynylatyn bolady», – dedi Adam quqyqtary jónindegi ýákil Elvıra Ázimova.